ჩემი აზრით, ეს არის პოლიტიკური დევნა ამ შემთხვევაში და არანაირ დანაშაულს აქ ადგილი არ აქვს, – განუცხადა ჟურნალისტებს ალეკო ელისაშვილის ადვოკატმა, გიორგი რეხვიაშვილმა.
მისივე თქმით, საჭირო იყო ახალი მტკიცებულებების შეგროვება, რათა აღნიშნული გზით აქტიური პოლიტიკოსი გააჩერონ.
„ვვარაუდობ, რომ დასჭირდათ ახალი საქმე, ახალი მტკიცებულებების შეგროვება, რომ ეს აქტიური პოლიტიკოსი რაღაც გზით გააჩერონ და ჩემი აზრით, ეს არის პოლიტიკური დევნა ამ შემთხვევაში და არანაირ დანაშაულს აქ ადგილი არ აქვს.
გამორიცხულია, მთაწმინდაზე მცხოვრები ადამიანი მიდიოდეს ღამის საათებში სასამართლოსთან და უკიდებდეს ცეცხლს, ან ცეცხლის წაკიდების მცდელობა ჰქონდეს. ბევრი სახელმწიფო სტრუქტურა და შენობა არსებობს მისი სახლის მიმდებარე ტერიტორიაზე. მსგავსი დანაშაულის ჩადენის სურვილი რომ ჰქონოდა, შეძლებდა უფრო ახლოს, სახლთან განეხორციელებინა და არა ამხელა მანძილზე“, – განაცხადა ელისაშვილის უფლებადამცველმა.
სასამართლოს კანცელარიის დაწვისა და დაზიანების ფაქტზე დაკავებული ალეკო ელისაშვილი დიღმის იზოლატორშია მოთავსებული.
შსს-ს ინფორმაციით, დაკავებულია კოალიცია „ძლიერი საქართველო – ლელოს” ერთ-ერთი ლიდერი, ალექსანდრე ელისაშვილი, რომელმაც დღეს დილით, გამთენიისას, თბილისის საქალაქო სასამართლოს კანცელარიის შენობის დაწვა სცადა.
კომენტარები