„ცესკოს“ თავმჯდომარე, თამარ ჟვანია ამბობს, რომ პანდემიის მიუხედავად, ძალიან ბევრმა ადამიანმა გამოხატა საკუთარი ნება და მივიდა არჩევნებზე, ამიტომ მათ გადაწყვეტილებას პატივი უნდა ვცეთ.
„ძალიან მნიშვნელოვანი იქნება, გავაგრძელოთ საარჩევნო პროცესი, ყველა დავრჩეთ სამართლებრივ ჩარჩოებში და ჩვენ, ცენტრალური საარჩევნო კომისია ყველაფერს გავაკეთებთ, რომ ბოლომდე მივიყვანოთ საარჩევნო პროცესი, ბოლომდე მივიყვანოთ შედეგების დაკორექტირება და ოფიციალურ მონაცემებში ასახვა.
რაც ყველაზე მთავარია, არ შეიძლება, ორ მილიონ ამომრჩეველს დავუკარგოთ ის სურვილი და მონაწილეობა, რომელმაც ამხელა ლეგიტიმაცია მისცა ამ არჩევნებს. ძალიან მაღალი იყო აქტივობა პანდემიის პირობებში, რაც ძალიან ბევრ ქვეყანას გაუჭირდა ასეთ რთულ ვითარებაში. ჩვენმა მოქალაქეებმა მაღალი პასუხისმგებლობით გამოხატეს საკუთარი აზრი არჩევნებზე. ამიტომ ყველამ ერთად ხელი უნდა შევუწყოთ და პატივი ვცეთ მათ მიერ დაფიქსირებულ ნებას“
შეგახსენებთ, დიდუბე-ჩუღურეთის 36-ე უბნის რეგისტრატორს კორონავირუსი დაუდასტურდა და მიუხედავად იმისა, რომ რეგისტრატორი საარჩევნო უბანზე გახდა ცუდად და იქედან წაიყვანა სასწრაფო დახმარების მანქანამ, ამ წუთამდე, არც ცესკო, არც ჯანდაცვა, განცხადებას არ აკეთებს.
ამომრჩევლებმა მოგვაწოდეს ინფორმაცია, რომ მას შემდეგ, რაც დაინფიცირებული რეგისტრატორი გადაიყვანეს, კომისიამ არ იმოქმედა წესის შესაბამისად, არ დაკეტა უბანი, არ ჩაატარა დეზინფექცია, არ გადაიყვანა კომისიის წევრები იზოლაციაში, არ შეცვალა ახალი წევრებით და მეტიც, არ გააფრთხილა მოსახლეობა, 2 ნოემბრის საღამოს, შემთხვევით, რომ არ გაეგო მედიას, არანაირი განცხადება არ გაკეთებულა.
ვკითხეთ ცესკოს, გატარდა თუ არა ღონისძიებები და რატომ არ გააფრთხილეს ამომრჩეველი – ერთხელ არა, სამჯერ ვკითხეთ საღამოს მანძილზე, სამჯერვე გვიპასუხეს, რომ გაგვაგებინებენ პასუხს, თუმცა, ამაოდ ველოდეთ, ბოლოს მივწერეთ, რომ ვერ დავიცდით და უნდა გავართხილოთ მოსახლეობა, არც მაგ წერილზე გვიპასუხეს.
კომენტარები