არ მსურს კომენტარის გაკეთება – აცხადებს “მთავარ არხთან” სატელეფონო საუბარში თანაინვესტირების ფონდის ყოფილი ხელმძღვანელი გიორგი ბაჩიაშვილი, რომელსაც პროკურატურამ დღეს ბრალი წაუყენა. თუმცა, ბაჩიაშვილი დაგვპირდა, რომ ადვოკატს დაგვაკავშირებს.
პროკურატურის ინფორმაციით, გიორგი ბაჩიაშვილმა 39 215 820 აშშ დოლარის ღირებულების ბიტკოინი მიითვისა. ის დიდი ოდენობით კრიპტოვალუტის მართლსაწინააღმდეგო მითვისებისა და უკანონო შემოსავლის ლეგალიზაციის ფაქტზეა ბრალდებული.
პროკურატურის განცხადების მიხედვით ირკვევა, რომ ინვესტორთან ერთად შექმნილი ბიტკოინების ქარხნიდან გამომუშავებულ კრიპტოვალუტას ბაჩიაშვილი ითვისებდა და ინვესტორს კუთვნილ წილს არ აძლევდა. ჯერჯერობით უცნობია, არის თუ არა ეს ინვესტორი ბიძინა ივანიშვილის თანაინვესტირების ფონდი, რომელიც ამ სფეროში სოლიდურ კაპიტალს აბანდებდა.
ფონდი ბიძინა ივანიშვილმა 2013 წელს დააარსა და ბაჩიაშვილი მისი აღმასრულებელი დირექტორი 2019 წლამდე იყო.
პროკურატურამ ბრალდებულის მიმართ სისხლისსამართლებრივი დევნა დიდი ოდენობით კრიპტოვალუტის მართლსაწინააღმდეგო მითვისებისა და უკანონო შემოსავლის ლეგალიზაციის ფაქტებზე დაიწყო, რაც სასჯელის სახედ და ზომად 9-დან 12 წლამდე თავისუფლების აღკვეთას ითვალისწინებს.
კომენტარები