,,არ მესმის რას ნიშნავს “ვემიჯნები რიონის ხეობის მოძრაობას!” – ლევან ლორთქიფანიძე

,,კავკასიური სახლის” წევრი, ლევან ლორთქიფანიძე:

,,რამდენჯერმე საჯაროდ გამიკრიტიკებია რიონის ხეობის მცველთა მოძრაობა ზედმეტი კარჩაკეტილობისა და სხვა ჯგუფებთან ზედაპირული ურთიერთობების გამო.

როდესაც ხანგრძლივ და უთანასწორო ბრძოლაში ხარ ჩართული, თან ასეთ დაუნდობელ და სასტიკ, ჩამორჩენილ საზოგადეობაში ცხოვრობ სირცხვილი არ არის გამოცდილი საერო ადამიანებისგან რჩევის მიღება, მათთან დიალოგი.

იმგვარ შეკრებაში მონაწილეობა, რომელსაც წინ უძღვოდა ადამიანების დასისხლიანება, თვალების ამოფუფქვა, მოტოციკლეტებით მოქალაქეების გადაჯეგვა არის უმძიმესი შეცდომა. იმ ადამიანებსაც უფრო მეტი თანაგანცდით უნდა მოეკიდო, რომლებთაც თავგანწირვით უბრძოლიათ შენ გვერდით, რომელთაც მთელი გულით უყვარხარ. საზოგადოება მხოლოდ მეუფე სტეფანესაგან არ შედგება…

უბრალოდ, არ მესმის რას ნიშნავს “ვემიჯნები რიონის ხეობის მოძრაობას!”, რომელიც უდახვეწილესი და კონგენიალური დეკლარაციებით გამოაცხადეს ჩემთვის პატივსაცემი ადამიანებით დაკომპლექტებულმა არასამთავრობო ორგანიზაციებმა. იმედია, ეს ტექსტები უკვე ლათინურადაც არის თარგმნილი რომის საყდრის იშვიათ გამოცემათა საიდუმლო განყოფილებაში გადასაგზავნად და საუკუნოდ შესანახად.

რიონის ხეობის მცველების გარეშე, ხაიშელების გარეშე, პანკისელების გარეშე, სუფსის ნაპირებზე მცხოვრებთა გარეშე, ზოგადად ადგილობრივი მოსახლეობის გარეშე ვერც ერთი რეგიონის, ვერც ერთი მდინარის გადარჩენა ვერ მოხერხდება; ადგილობრივი მოსახლეობის, ხალხის თანამონაწილეობის გარეშე ვერავინ დაიცავს სოციალურ სამართლიანობას, გარემოს … ხალხის გარეშე ვერც კოლონიალიზმსა თუ ნეოლიბერალური გლობალიზაციის თანმდევ კატასროფებს შეეწინააღმდეგება ვინმე.

ხალხის გარეშე სამოქალაქო საზოგადოების საქმიდან დარჩება ის ბუკლეტები და ბროშურები, რომლითაც გამოტენილია ფეშენებელური ოფისების საკუჭნაოები, ვესტიბიულები და სხვენები! რომელთაც წლებია არიგებენ ყველა შეკრებაზე და მაინც ვერ ამოწურეს ტირაჟი; რომელთა მორჩენილ ნაწილს ბოლოს მაკულატურაში ჩააბარებენ; და კიდევ რამდენიმე პროგრესული ცვლილება რომელიღაცა დადგენილების რომელიღაცა პუნქტში.

რადგან ჩვენს გატანჯულ თანამოქალაქეებს გენდერის კვლევების საღამოს ფაკულტეტი დაუსწრებლად არ აქვთ დამთავრებული, რადგან ამ სისტემაში არ შეუძლიათ თამარ კინწურაშვილისთვის საზომებით წერა, ამიტომ წყალს წაუღია ყველაფერი? ამიტომ მარტო დარჩნენ თურქეთისა და ნორვეგიის ელჩების, ნათია თურნავას მიერ აწყობილი მონსტრის, ლომინაძისნაირი გარეწრების წინაშე? ამიტომ მარტო დარჩნენ ავანტიურისტი ფსევდოკონსერვატორებისა და კოლაბორაციონისტი კლერიკალების ამარა??? ერთ დღეში გინდათ ისეთი გარემოს მიღწევა, რომელიც პოლონეთსა და უნგრეთშიც არ არის ??? ჩეხასლავაკიაზე და აღმოსავლეთ გერმანიის ბიურგერული მოსახლეობის ნაწილზე აღარაფერს ვამბობ.

თუ შეცდომა მოუვიდათ, გააკრიტიკე, დაუმტკიცე შენი სიმართლე, აუხსენი! (თუ ვერც აზროვნებენ და აზრი არ აქვს???) თუ რამით შეგიძლია ქვემოდან დაწყებული მოძრაობის დახმარება, დაეხმარე! დეკლარაციებით თავის მართლება და ადამიანების მიგდება, არ შეიძლება.

ვწუხვარ რიონის ხეობის მცველთა შეცდომების გამო, მაგრამ სულ რომ ჩლიქები და რქები ამოუვიდეთ მარტო არ დავტოვებ მათ ამ ქვეყნისთვის, სოციალური და ეკოლოგიური სამართლიანიბისთვის ბრძოლაში! იქნებ გამოვადგე რამეში…

P.S. კეთილი გულის ადამიანები ისედაც მიხვდებიან რას და როგორ ვამბობ. იდიოტებს კი ვემიჯნები …”