აფხაზეთის კონსტიტუციური წყობა განხილვას არ ექვემდებარება. ამის შესახებ დე ფაქტო პრეზიდენტის ადმინისტრაცია მოსკოვში დე ფაქტო პრეზიდენტის ასლან ბჟანიას ვიზიტის მიზნებსა და მოლოდინებზე გავრცელებულ ინფორმაციასთან დაკავშირებით აცხადებს.
დე ფაქტო ადმინისტრაციის ცნობით, ინფორმაციის სხვადასხვა არხითა და ინტერნეტით გავრცელდა ინფორმაცია, თითქოს, ვიზიტის მსვლელობისას აფხაზეთის სტატუსი უნდა განხილულიყო.
„აფხაზეთის რესპუბლიკის, როგორც სუვერენული, დემოკრატიული და სამართლებრივი სახელმწიფოს, ხალხის თავისუფალი თვითგამორკვევის უფლებით ისტორიულად ჩამოყალიბებული კონსტიტუციური წყობის საფუძველი კანონით არის გათვალისწინებული და განხილვას არ ექვემდებარება“, – ნათქვამია განცხადებაში.
ასლან ბჟანია მოსკოვში ვიზიტით 14 თებერვალს გაემგზავრა და რუსეთის ფედერაციის პრეზიდენტის ადმინისტრაციის წარმომადგენლებთან შეხვედრები გამართა. მოსკოვში ასევე იმყოფება ე.წ. სამხრეთ ოსეთის დე ფაქტო პრეზიდენტი ალან გაგლოევი.
კომენტარები