თურქეთში გამართულ საერთაშორისო, ქორეოგრაფიული ხელოვნების კონკურსში ანსამბლმა “მართვემ” გაიმარჯვა.
ანსამბლი 1993 წელს ბადრი სირაბიძემ დაარსა, სამწუხაროდ, იგი 3 წლის წინ გარდაიცვალა და ახლა მისი შვილები, დავით და დარო სირაბიძეები წარმატებით აგრძელებენ მამის დაწყებულ საქმეს.
ბათუმში უკვე არაერთი თაობა ჰყავს ანსამბლს გამოზრდილი, არაერთი კონკურსის თუ ფესტივალის პრიზიორია, თუმცა, 2025 წლის ივნისში, თურქეთში გამართულ საერთაშორისო კონკურსში მონაწილეობდა გოგო–ბიჭების ის ჯგუფი, რომლის სრული უმრავლესობა, არათუ პირველად წარსდგა მსგავსი მასშტაბის საერთაშორისო კონკურსში, არამედ, საერთოდ, პირველად წარსდგა მაყურებლის წინაშე. ანსამბლის ამ ჯგუფისთვის, ეს წარდგენა დებიუტი იყო.
ანსამბლმა ქალ–ვაჟთა მთიულური აჩვენა მაყურებელს და ჟიურის.
ანსამბლის დებიუტი იმდენად წარმატებული იყო, რომ ერთდროულად გრან პრით და მთავარი ჯილდოთი, სუპერ გრან პრით დაჯილდოვნენ.
როგორც დარო სირაბიძე გვიყვება, როცა გაიგეს, ანსამბლი გრან პრით დაჯილდოვდა, ჩათვალეს, რომ მთავარი ჯილდო, სუპერ გრან პრი, სხვა ანსამბლს ერგო, ამიტომ, ორმაგად გასაოცარი და სასიხარულო იყო, როცა მოულოდნელად მეორე ჯილდოს მფლობელადაც “მართვე” დასახელდა.
ერთი შეხედვით, მეტი რაღა უნდა მოხდეს, დებიუტით წარსდგა ჯგუფი, აიღო ორი უდიდესი ჯილდო, თუმცა, კიდევ იყო ერთი სიურპრიზი. როგორც აღმოჩნდა, ჟიური იმდენად მოიხიბლა, რომ ჯიურის ერთ–ერთი წევრის გადაწყვეტილებით ანსამბლის ხელმძღვანელებს ფულადი ჯილდოები გადაეცათ.
კომენტარები