,, ან ვინ დაარეგისტრირა ამ სახელით, ან საპატრიარქოს როგორ მოუვიდა თავში ეს დასახელება” – რომან გოცირიძე

პარლამენტარი რომან გოცირიძე სოციალურ ქსელში წერს:

,,როდესაც განათლების სამინისტროს განათლების ხარისხის უღირსი მარიონეტები ე. წ. დემირელის სისტემის სკოლების დახურვით არიან დაკავებულები (ხუთი სკოლა უკვე დახურეს და ახლა ქუთაისის სკოლაში ჰყავთ შეგზავნილი დამსჯელი რაზმი), განათლების სამინისტრო იხილავს “საქართველოს საპატრიარქოს ხულოს წმიდათა მამათა და დედათა აჭარაში თურქთაგან წამებულთა სახელობის სკოლის” ავტორიზაციის საკითხს. ან ვინ დაარეგისტრირა ამ სახელით, ან საპატრიარქოს როგორ მოუვიდა თავში ეს დასახელება (ისე, მაგათგან რა უნდა გაგიკვირდეს) ან განათლების სამინისტრო როგორ იხილავს ამ დასახელების სკოლის გახსნის საკითხს.

ეს არის ანტიკონსტიტუციური, სიძულვილის გამღვივებელი და შეურაცმყოფელი ქმედება. იგი ჩრდილს აყენებს ჩვენს სტრატეგიულ პარტნიორ ქვეყანასთან კეთილმეზობლურ ურთიერთობებს. კონსტიტუციით აკრძალულია ისეთი ქმედება, რომელიც აღვივებს ეროვნულ, კუთხურ, რელიგიურ ან სოციალურ შუღლს. იქნებ განათლების სამინისტროს ჩინოვნიკებმა ყურად იღონ ეს ფაქტი.”