“საქართველოს მთავრობა პასუხისმგებელია იმაზე, რომ ვერ უზრუნველყო ლგბტ აქტივისტებისა და ჟურნალისტების უსაფრთხოება და შეკრებისა და გამოხატვის თავისუფლება. იმის მაგივრად, რომ გაეთვალისწინებინათ აქციის ძალადოვრივი ხასიათი და შესაძლო რისკები, გაეცათ სათანადო პასუხი სასტიკ თავდასხმებზე, მაღალჩინოსნებმა პრაიდის წევრებს მოუწოდეს უარი ეთქვათ თავიანთ გეგმებზე”, – განაცხადა Amnesty International- ის დირექტორის მოადგილემ აღმოსავლეთ ევროპასა და ცენტრალურ აზიაში, დენის კრივოშეევმა, “თბილისი პრაიდის” მოწინააღმდეგეთა მხრიდან გუშინ მომხდარ აგრესიაზე.
ხელისუფლების მხრიდან გაკეთებული შეფასებებისა და მოწოდებების შემდეგ, ორგანიზაციისთვის არ არის გასაკვირი რატომ არ იყო პოლიცია საკმარისი რაოდენობით წარმოდგენილი და რატომ ჰქონდათ მათ რეაგირება მხოლოდ ძალადობაზე და არა ლგბტქ აქტივისტების უფლებების დაცვასა და მათი გეგმების განხორციელებაზე.
“ამჯერად ხელისუფლება უნდა ეცადოს ყველაფერს იმისთვის, რომ გამოასწოროს არსებული სიტუაცია. მათ საჯაროდ უნდა დაგმონ განხორციელებული ძალადობა, რაც ნათლად გამოხატავს, რომ ასეთი ძალადობა სისხლის სამართლის დანაშაულია და მისი შეწყნარება არ მოხდება. დაუყოვნებლივ უნდა დადგინდეს დამნაშავეები და დაეკისროთ მათ პასუხისმგებლობა სამართლიანად ჩატარებულ სასამართლო პროცესზე”, – განაცხადა დენის კრივოშეევმა.
გუშინ “თბილისი პრაიდის” საწინააღმდეგო აქციაზე განხორციელებულ ძალადობასა და კანონდარღვევას გამოეხმაურნენ სხვა საერთაშორისო და ადგილობრივი ორგანიზაციები, მათ მოუწოდეს ხელისუფლებას თავისი მოქალაქეების უფლებების დაცვისკენ და კანონდარღვევის აღკვეთისკენ.
5 ივლისს თბილისში “თბილისი პრაიდის” ორგანიზებით “ღირსების მარში” უნდა გამართულიყო, თუმცა ჰომოფობიურად განწყობილი ასობით ადამიანი ქუჩაში გამოვიდა, მათ იძალადეს ჟურნალისტებზე, დაარბიეს მოძრაობა “სირცხვილიას” და “თბილისი პრაიდის” ოფისები.
პრაიდის ორგანიზატორებმა “ღირსების მარშის” გაუქმება გადაწყვიტეს.
კომენტარები