“ამის თუ ეშინია პროკურატურას, შეუძლიათ დამაბან ეზოში ძაღლივით და ჩემ შვილიშვილებს მაინც გავეთამაშები” – ჯანო არჩაია მოსამართლეს

პროევროპულ აქციაზე დაკავებულმა 49 წლის ჯანო არჩაიამ მოსამართლე ნინო გალუსტაშვილს მიმართა და უთხრა:

მე ჩემ თავში ისე ვარ დარწმუნებული, ღმერთის წინაშე მართალი ვარ და დარწმუნებული ვარ იმაშიც, რომ აქ გაცნობილი ეს ბიჭებიც, ყველანი უსამართლოდ ვსხედვართ დღეს აქ. რაც შეეხება იმას, პროკურორებისგან გაქცევაზე გამოთქმულ (აზრს) თქვენ არ ვიცი, ღმერთმა, მომავალში გამრავლებას გისურვებთ, მაგრამ აგერ თითქმის ჩემი ხნის ხალხი ზის და ეყოლებათ ალბათ შვილები, შეიძლება შვილიშვილებიც ან დისშვილები. რაც არ უნდა იყოს, ორი თვე გვაქვს დარჩენილი, თუ რაღაც, მისჯამდე, რომელსაც გადაწყვეტენ, თქვენ არა, იქ ზემოდან მოგცემენ მითითებას, მანამდე, იმ ორი თვით მაინც თუ შეიძლება და მე მგონი არის შესაძლებელი, რომ ჩემ პატარა შვილიშვილებთან გავატარო.

თუ იმ მუხლში რომელშიც არის გირაო, გირაოს გარდა ბრასლეტს ეძახიან, ესენი თუ არ არის საკმარისი, მე შემიძლია, რაღაც შემოგთავაზოთ ისეთიც, პატარა ეზო მაქვს სახლში, იქნება სულ 8 მეტრი ალბათ სიგრძეში ჭიშკრამდე, ნანახი მაინც გექნებათ, მე მგონი თქვენ ეზოც გაქვთ, შეიძლება თქვენც გაქვთ ეზოში, ავ ძაღლს როგორ აბამენ მავთულზე და დარბის სახლიდან ჭიშკრამდე. მეც პატარა ეზო მაქვს-მეთქი, იმ ეზოში გექნებათ ნანახი ავ ძაღლს როგორ აბამენ და სახლიდან ჭიშკრამდე რომ დარბის, თუ მე ასეთი ავი ვარ და საშიში ვარ, რომ ხალხს ქუჩაში დავერევი, სპეცრაზმს თავში ქვას ჩავარტყამ, ამის თუ ეშინია პროკურატურას, შეუძლიათ დამაბან იქ ძაღლივით და ჩემ შვილიშვილებს მაინც გავეთამაშები“, – თქვა აღკვეთის ღონისძიებასთან დაკავშირებით სასამართლო პროცესზე ჯანო არჩაიამ.

დაკავებულებს – ანდრო ჭიჭინაძეს, ონისე ცხადაძეს, ჯანო არჩაიას, რუსლან სივაკოვს, ლუკა ჯაბუას, გურამ მირცხულავას, ვალერი თეთრაშვილს, გიორგი ტერიშვილს, ირაკლი ქერაშვილს, რევაზ კინაძესა და სერგეი კუხარჩუკს ბრალი საქართველოს სისხლის სამართლის კოდექსის 225-ე მუხლის მეორე ნაწილით წარედგინათ, რაც ჯგუფურ ძალადობაში მონაწილეობას გულისხმობს.

აღნიშნული დანაშაული სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.