„ამის გამო გამლანძღა პირდაპირ ეთერში ივანიშვილმა, არადა, ტყუილი ვთქვი? ასე არ არის?“ – სოსო ცინცაძე

ლევან ჯავახიშვილი

„ალიას“ ესაუბრება პოლიტოლოგი სოსო ცინცაძე.

– ირაკლი კობახიძემ მადლობები უხადა ევროკომისიას, ევროკავშირის გზაზე წინ წავიწიეთო, მადლობას რატომ იხდის?

– რა გითხრა, აბა? ადრე „აღმოსავლური პარტნიორობა“ ერქვა ამ პერპექტივას, ახლა პოტენციური კანდიდატობა ჰქვია. რეალურად, არაფერი შეცვლილა და არც წინ წავწეულვართ ევროკავშირისკენ. ფაქტია, ჩვენი ევროკავშირის კანდიდატობა  გადაიდო და როდემდე, კაცმა არ იცის. ვფიქრობ, ეს უარესი ვითარებაა იმასთან შედარებით, რაც აქამდე გვქონდა, „აღმოსავლურ პარტნიორობას“ ვგულისხმობ. გამოდის,  ტყუილად იხადა მადლობები კობახიძემ.

– პირველ რიგში, რას მოგვცემს ევროკავშირი, თუ ოდესმე გავხდით მისი წევრები?

– ბევრ რაიმეს, ბევრ სიკეთეს, მაგრამ ახლა აქ ყველაფერს ვერ ჩამოვთვლი. ერთს და ძალიან მნიშვნელოვანს ვიტყვი. ევროკავშირს აქვს „გათანაბრების ფონდი“. ღარიბი ქვეყანა რომ ხდება ევროკავშირის წევრი, ამ ფონდიდან მას ათეულობით  მილიარდ ევროს აძლევენ, რომ საშუალო ეკონომიკური და სოციალური პარამეტრებით, გაუთანაბრდეს ევროკავშირის ქვეყნებს. ეს კრედიტი არ არის, საჩუქარია. ცხადია, ამან  ევროკავშირის ახალ  წევრ ქვეყნებში  გამოიწვია პენსიის, სოციალური შემწეობის გაზრდა,  საშუალო ხელფასის გაზრდა… რა ვიცი, უამრავი მატერიალური სიკეთე მოსდევს ამ ფონდის დაფინანსებას. პირველ რიგში, ეს დავკარგეთ და დემოკრატიული რეფორმები, დამოუკიდებელი სასამართლო და  ათასი რაღაცა.

– გამოდის, ბიძინა ივანიშვილმა და მისმა გარემოცვამ საკუთარ კეთილდღეობას შესწირა  ქვეყნის უახლესი მომავალი?

– ეგრე კი გამოდის, მაგრამ მოდი, ნურავის ნურაფერს დავაბრალებთ. 2012 წელს ბიძინა ივანიშვილი გაყალბებული არჩევნებით მოვიდა ხელისუფლებაში? არ მისცა ხალხმა ხმა „ქართულ ოცნებას“? მისცა და მოტყუვდა ხალხი. მე არ მიმიცია მაშინ  ხმა, რადგან ვიცოდი, ქვეყანას ხეირს არ დააყრიდა. ივანიშვილმა, ვიდრე ხელისუფლებაში მოვიდოდა, თავის პირველსავე  პრესკონფერენციაზე გამლანძღა, სოსო ცინცაძე არაფერი ექსპერტი არ არის, არაფერი არ იცისო. იმიტომ გამლანძღა, რადგან  ვთქვი, არ არის ივანიშვილი პოლიტიკოსი და არც დადგება მისგან პოლიტიკოსი-მეთქი. ეს ჩარჩა გულში და იმიტომ მახსენა ცუდად. ტყუილი ვთქვი? გამოვიდა მისგან პოლიტიკოსი? არა. საერთოდ, თუ საქმე არ გიყვარს, იმ საქმეში წარმატებას ვერ მიაღწევ – ეს დაუწერელი კანონია.  ივანიშვილს კი არ უყვარს პოლიტიკა. მოკლედ, ნურავის ნურაფერს დავაბრალებთ, მთავარი დამნაშვეა ხალხი და მერე სხვები. „ნებისმიერ ხალხს ჰყავს ის ხელისუფლება, რომელსაც ის იმსახურებს“ – ესეც ევროპელი  შარლ დე გოლის სიტყვებია.