ამერიკის სადაზვერვო სამსახურმა აღმოაჩინა “პირველი მინიშნებები”, რომ 700 მილიონი დოლარის ღირებულების “სუპერიახტა”, რომელიც ამჟამად ტოსკანაში, Marina di Carrara-ს პორტშია, შესაძლოა ვლადიმერ პუტინს ეკუთვნოდეს. ამის შესახებ ინფორმაციას New York Times-ი ავრცელებს.
რამდენიმე დღის წინ, აღნიშნული გამოცემა წერდა, რომ იტალიური, მხარე ტოსკანას ერთ-ერთ პორტში მდგომ 140 მეტრის სიგრძისა და 10 167 ტონის მქონე იახტა “შეჰერეზადეს” მფლობელის ვინაობას არკვევდა. როგორც ირკვევა, კომპანია The Italian Sea Group-მ არასწორი ინფორმაცია გასცა, როდესაც განაცხადა, რომ აღნიშნული იახტა სარემონტო სამუშაოების გამო იმყოფება Marina di Carrara-ს პორტში და ის არ ეკუთვნის რუსეთის პრეზიდენტ ვლადიმერ პუტინს.
ამერიკის სადაზვერვო სამსახური, არ ამჟღავნებს იმ დეტალებს, რამაც ისინი ვლადიმერ პუტინის კვალზე გაიყვანა. გაი ბენეტ-პირსმა, „შეჰერეზადეს“ კაპიტანმა, კვირის დასაწყისში განაცხადა, რომ პუტინი არ იყო მფლობელი და რომ რუსეთის პრეზიდენტს იქ ფეხი არასდროს დაუდგამს, მაგრამ მფლობელის დასახელებისგან თავი შეიკავა. აღნიშნა მხოლოდ ის, რომ იახტა ეკუთვნის ისეთ პიროვნებას, რომელსაც სანქციები არ ეხება.
იტალიელმა სამართალდამცველებმა, უკვე შეაგროვეს საჭირო დოკუმენტაცია იახტის მესაკუთრეობის შესახებ, რომელთაც მთავრობას წარუდგენენ, შემდგომ სწორედ მთავრობა გადაწყვეტს, არის თუ არა იახტის მფლობელი, სანქციების სიაში მყოფი პირი. პროცესი, შესაძლოა რამდენიმე კვირა გაგრძელდეს.
კომენტარები