„ამას პირველად ვყვები – გახარიას შევხვდი“ – ინტერვიუ „ქართული ოცნების“ ერთ-ერთ დამფუძნებელთან

თამო კეშელავა

„ალიას“ ესაუბრება მწერალი, „ქართული ოცნების“ თანადამფუძნებელი, მერაბ შათირიშვილი.

–2 წლის წინ უკვე ყოფილ პრემიერ–მინისტრზე, გიორგი გახარიაზე, „ალიასთან“ თქვით, რომ გახარიამ უნდა მოახერხოს და ორპოლუსიანობის პირობებში, მეორე პოლუსიდან გაუშვას ნაციონალური მოძრაობა, დაახლოებით ასე თქვით, რომ ცალ მხარეს იქნება „ქართული ოცნება“, მეორე მხარეს გახარიას პარტია, შუაში, ნაციონალური მოძრაობა და უნდა გაჭყლიტონ ნაციონალური მოძრაობა პოლიტიკურად და ამ შემთხვევაში ექნებოდა მის გამოყოფას „ოცნებიდან“ აზრი – ეს ასე არ მოხდა და რა არის მიზეზი?

–კი, ასე ვთქვი და ახლა პირველად მოვყვები ამას თქვენთან, არსად მითქვამს ჯერ, თუმცა, ცხადია, უსაფრთხოების სამსახურს კი ეცოდინება. ახალ შექმნილი ქონდა გიორგი გახარიას პარტია, როცა მას ხარაგაულში შევხვდი და ვესაუბრე. პირადად ვუთხარი, რომ უნდა ითაოს „ოცნებაზე“ განაწყენებული აქტივის მეთაურობა, ძალიან დიდი რესურსია ეს და ამ რესურსით შეძლებდა ნაციონალური მოძრაობის გადასროლას მესამე ადგილზე. „ქართული ოცნების“ რესურსშივე იპოვიდა დასაყრდენს, იმ ამორჩეველში, რომელსაც არ უნდა ქართული ოცნების არჩევა, მაგრამ მეორე ტურში, მაინც ქართულ ოცნებას ხაზავს, იმიტომ, რომ არ უნდა ნაციონალური მოძრაობის მობრუნება.

– და რა გიპასუხათ?

– მიპასუხა ეს ძალიან რთული იქნება და შრომატევადიო.

– ვერ გააკეთა ეს გახარიამ, თუ არ გააკეთა?

– ვერ გააკეთა, თვითდაჯერებულნი არიან, ჰგონიათ ყველაფერი იციან, ვერ აანალიზებენ რა ხდება, არ დადიან ავტობუსებში, მარშუტკებში, მეტროებში, ბაზრებში, ჰგონიათ დედამიწის ჭიპები არიან და მე ვინ ვარ, ერთი ჩვეულებრივი ადამიანი, მეორეს მხრივ, დიდი გამოციდილებით, რომელმაც ვიცი იმ 2012–იანელების, იმ ე.წ. მეცხრე ლეგიონის განწყობა და ზუსტად ვიცი, რამხელა რესურსზეა საუბარი.