დეპუტატი ლევან იოსელიანი მიიჩნევს, რომ უკრაინის მხარდასაჭერ დელეგაციაში პარლამენტის თავმჯდომარის ყოფნა ძალიან მნიშვნელოვანია. დეპუტატი მზად არის, როგორც ვიცესპიკერმა ყველაფრის კოორდინაცია საკუთარ თავზე აიღოს, თუმცა აღნიშნავს, რომ მაღალი რანგის ინსტიტუციების ხელმძღვანელის ვიზიტს გაცილებით დიდი მასშტაბი აქვს.
„ძალიან მნიშვნელოვანია, რომ უკრაინის მხარდაჭერისას, საქართველო გამოჩნდეს ღირსეულად. მე გავუკეთე კოორდინაცია ოპოზიციურ პარტიებთან დიალოგს და შევთანხმდით, რომ წავალთ ბუჩაში და გამოვხატავთ ჩვენს სამძიმარს ოპოზიციის სახელით მაინც, მას შემდეგ რაც “ქართულმა ოცნებამ” უარი თქვა წასვლაზე.
დღეს “ქართულმა ოცნებამაც” დაადასტურა, რომ მზად არიან წარმოდგენილი იყვნენ დელეგაციაში და ერთობლივად ჩავიდეთ უკრაინაში ერთიანი მხარდაჭერის საჩვენებლად. მიუხედავად იმისა, რომ მე მზად ვარ როგორც ვიცე სპიკერმა ამ ყველაფრის კოორდინირება უზრუნველვყო, ძალიან მნიშვნელოვანია, დელეგაციას პარლამენტის თავმჯდომარემ უხელმძღვანელოს, რადგან მაღალი რანგის ინსტიტუციების ხელმძღვანელის ვიზიტს აქვს გაცილებით დიდი მასშტაბი.
საერთაშორისო კონტექსტიდან გამომდინარე ამ ნაბიჯის გადადგმა დღეს საქართველოს სჭირდება და არა უკრაინას,“- წერს ლევან იოსელიანი სოციალურ ქსელში.
ცნობისათვის, საქართველოში უკრაინის დროებითი რწმუნებულის, ანდრეი კასიანოვის ცნობით, საქართველოს პარლამენტის თავმჯდომარემ მიიღო მიწვევა, რათა თავად ჩასულიყო უკრაინის ქალაქ ბუჩაში და ომის დანაშაულები საკუთარი თვალით ეხილა. საქართველოს პარლამენტის თავმჯდომარემ, შალვა პაპუაშვილმა ოფიციალური განცხადებით უპასუხა უკრაინელი კოლეგის მიწვევას ბუჩაში ვიზიტთან დაკავშირებით. თუმცა პაპუაშვილი განცხადებაში არ ადასტურებს, რომ უკრაინაში ჩასვლას აპირებს.
კომენტარები