“ლეიბორისტული პარტიის” ლიდერი შალვა ნათელაშვილი პარლამენტში შედის, თუმცა 15 თებერვალს საკანონმდებლო ორგანო მისთვის უფლებამოსილების შეწყვეტას უყრის კენჭს.
პარტიის ეროვნულმა პოლიტიკურმა კომიტეტმა ნათელაშვილის პარლამენტში შესვლის გადაწყვეტილება დღეს გამართულ სხდომაზე მიიღო, რასაც წინ უძღვოდა სოციალურ ქსელებში მოსახლეობის გამოკითხვა. პარტიის ცნობით, გამოკითხვაში 7 ათასამდე ადამიანმა მიიღო მონაწილეობა და აბსოლუტურმა უმრავლესობამ ხმა შალვა ნათელაშვილის პარლამენტში შესვლას მისცა.
„15 თებერვალს პარლამენტის პლენარულ სხდომაზე განიხილავენ შალვა ნათელაშვილის უფლებამოსილების შეწყვეტის საკითხს. იმ შემთხვევაში თუკი პარლამენტი მიიღებს ანტიკონსტიტუციურ გადაწყვეტილებას, ამით ისინი ლეიბორისტული პარტიის ამომრჩევლებს შეუზღუდავენ კანონიერ უფლებას ჰყავდეთ წარმომადგენელი პარლამენტში. ჩვენ ნებისმიერ შემთხვევაში ბრძოლას გავაგრძელებთ!“ – აცხადებს „ლეიბორისტული პარტია“.
რაც შეეხება მანდატის უფლებამოსილების შეწყვეტას, შალვა ნათელაშვილის თქმით, ეს თავად „ოცნებას“ დააზარალებს.
“…რაც შეეხება მანდატის შეწყვეტას. მე ვთხოვ რეჟიმის მეთაურს, კარგად გაიხსენოს, თაგვმა თხარა თხარაო, კატა გამოთხარაო. ამ მანდატის შეწყვეტას არ მოჰყვეს მისთვის ისეთი რამის გამოთხრა, რის შემდეგაც ის საბოლოო დაემშვიდობება ყველაფერს, რაც მოპოვებული აქვს”- აღნიშნა ნათელაშვილმა.
კომენტარები