“ალიაში” გასული ინტერვიუს შემდეგ, გამოძიებამ მეგი ბაქრაძის საქმის მნიშვნელოვანი მოწმეები დაკითხა

18 მარტს სწორედ მედიამ შეატყობინა საზოგადოებას, რომ 27 წლის ექთანი, მეგი ბაქრაძე კომაშია “ასტრაზენეკას” ვაქცინით აცრის შემდეგ!

ექთანს ვაქცინა გაუკეთდა ოფიციალური მონაცემით 12.15 საათზე და პირველივე დღეს ამირან გამყრელიძემ თქვა, რომ 30 წუთის მერე განუვითარდა მას ალერგიული რეაქცია.

მართალია, ექთანი უკვე დღის პირველი საათისთვის უკვე კომაში იყო და ინფორმაცია მედიაში დღის 4 საათისთვის გავრცელდა, დაავადებათა კონტროლის ცენტრმა ოფიციალური განცხადება დაახლოებით 6-ის ნახევრისთვის გააკეთა.

როგორ დაასწრო მედიამ მათ ინფორმაციის გავრცელება? ამდენი საათი რატომ სდუმდა ოფიციალური უწყება, ამ კითხვაზე პასუხი, ჩვენ კი არა, იმ ადამიანებსაც არა აქვთ, ვინც გვმოძღვრავს, რომ მედია უნდა გაჩუმდეს და დაელოდოს ოფიციალური უწყებების პასუხს!

ექთნის გარდაცვალების შემდეგ, გავიგეთ, რომ სხვა მედიკოსებსაც ჰქონიათ აცრისას ანაფილაქსიური შოკი, ამაზე თავად გამყრელიძემ ისაუბრა, თუმცა, არ უთქვამს, რატომ ისაუბრა ამაზე მეგის გარდაცვალების შემდეგ და არა მანამდე.

დღემდე უცნობია, რატომ გამოაცხადა ამირან გამყრელიძემ 18 მარტს, რომ ექთანს მხოლოდ 30 წუთის შემდეგ დაეწყო ანაფილაქსიის გამოვლინება, მაშინ, როცა კლინიკა გვიმტკიცებს, რომ ალერგიის გამოვლინება 15-20 წუთის შემდეგ დაიწყო? მოატყუეს ამირან გამყრელიძე? ვერ მოახერხა პირველი საათიდან 6-ის ნახევრამდე ინფორმაციის მოძიება?

მიუხედავად იმისა, რომ კვლევის პასუხი ჯერ კიდევ არ გვაქვს, მინისტრი უკვე გვიმტკიცებს, რომ კლინიკამ ყველა საჭირო დახმარება დროულად გაუწია ექთანს და მაშ, როგორ მოხდა, რომ არ დაემორჩილა კლინიკაში დაწყებული ანაფილაქსია მკურნალობას – პასუხი არ გვაქვს.

სამაგიეროდ, ჩვენ გვითხრეს, რომ ბზიკის ნაკბენზეც ემართებათ ასეთი შოკი ადამიანებს და იღუპებიან და კი, ასეა, მაგრამ თუ ადამიანს კლინიკაში უკბენს ბზიკი, თუ ადამიანს იმ ოთახში უკბენს ბზიკი, სადაც ანაფილაქსიის სამართავად ყველა მედიკამენტი უნდა იყოს – მაინც დადგება ფატალური შედეგი?

სახელმწიფომ ექთნის გარდაცვალების შემდეგ, აცრა შეაჩერა ისეთ კლინიკებში, სადაც არ არის რეანიმიაცია, გარდა ამისა, გაზარდა დაკვირვების დრო 30 წუთიდან 45 წუთამდე, გვეუბნება, რომ ეს ღონისძიებები ექთნის გარდაცვალების გამო მიიღო, მაგრამ აქვე იმასაც გვიმტკიცებს, რომ ამ გადაწყვეტილებებს საერთო არაფერი აქვთ ექთნის გარდაცვალებასთან.

რატომ გაიზარდა დაკვირვების დრო 45 წუთამდე და სინამდვილეში რამდენ ხანში გახდა ცუდად მეგი ბაქრაძე, რა იყო მისი გარდაცვალების მიზეზი? – ამ კითხვებზე პასუხი მთელ საქართველოს აინტერესებს.

ამირან გამყრელიძემ კი თქვა: “სამწუხაროდ, ხშირად ჩვენი მედიცინის მუშაკების ხვედრი, რომ შეიძლება შენ დაიღუპო, მაგრამ სხვას მისცე გადარჩენის საშუალება…” – არის თუ არა ეს აღიარება, ეს გამოძიებამ უნდა დაადგინოს, თუმცა, სავარაუდოდ, საქმე ისე დაიხურება, ამირან გამყრელიძე არც კი გამოიკითხება.

მიუხედავად კითხვებისა, გამოძიება არ ჩქარობს, “ალიას” გარდა არავის გახსენებია ის სამი ადამიანი, რომელიც კლინიკაში იყო მეგი ბაქრაძის აცრიდან მინიმუმ 20 წუთი, სხვათა შორის, ამ სამიდან ერთი გვიყვება, წასვლისას როგორ დაინახა, რომ ვაქცინაციის კაბინეტი დაიკეტა. უნდა ყოფილიყო, თუ არა ვაქცინაციის ოთახი ღია, სანამ დაყოვნების ოთახში ჯერ კიდევ იყო პაციენტი? – ამ კითხვას კლინიკა არ პასუხობს.

ექთმის აცრის პროცესი გადაიღო და მისი ინტერვიუ ჩაწერა აცრის შემდეგ ადგილობრივმა ტელევიზიამ – მეცხრე არხმა, რომლის ორი ჟურნალისტი და ოპერატორი პირდაპირი და არადაინტერესებული მოწმეები არიან, მათ ვაქცინაციის პროცესიც ნახეს და დიდი ალბათობით კადრში შესაძლებელია, მედიკამენტებიც ჩანდეს, არის თუ არა მობილიზებული, რომელი მედიკამენტია კონკრეტულად მზად და ა.შ. ბევრი თითქოს უმნიშვნელო დეტალი, შესაძლოა მნიშვნელოვანი იყოს, ეს გამოძიებას ჩვენგან არ უნდა ესწავლებოდეს. “ალიამ” ეს ადამიანები 21 მარტს ჩაწერა, სანამ ჩვენ არ ჩავწერეთ, მათ გამოძიება არც კი დაკავშირებია. ჩვენი კოლეგები გამოძიებამ მხოლოდ გუშინ, 25 მარტს გამოკითხა.