ალეკო ელისაშვილი – „გირჩს” უნდა პარლამენტში შემოსვლა, მაგრამ წვალობს და რაღაც გზებს ეძებს

ასეთი ტაქტიკა ცოტა უცნაურია. ვიცი, რომ „ქართული ოცნება“ და „გირჩი” ერთმანეთს ალბათ 50-ჯერ შეხვდნენ. არ ვიცი, რაზე შეთანხმდნენ, რაზე – არა და ამ შვიდ პუნქტზე ისაუბრეს თუ არა. ყოველ შემთხვევაში, მათი ტაქტიკა ცოტა გაუგებარია, – ამის შესახებ ოპოზიციონერმა დეპუტატმა, პარტია „მოქალაქეების“ წევრმა, ალეკო ელისაშვილმა განაცხადა.

მისივე თქმით, „გირჩის“ პუნქტებიდან რამდენიმეს „მოქალაქეები“ იზიარებენ და ხელიც აქვთ მოწერილი.

მათ შეეძლოთ, საჯარო შეხვედრა გაემართათ, შვიდი პუნქტი წარედგინათ, ულტიმატუმად ეთქვათ. არის რამდენიმე პუნქტი, რომელსაც ჩვენც ვიზიარებთ და ხელიც გვაქვს მოწერილი. მაგალითად, ის, რომ პირველი ინსტანციის მოსამართლეების არჩევა მოხდეს და ადამიანს უფლება ჰქონდეს, მოსამართლე აირჩიოს. ასევე პოლიციის შერიფები აირჩიონ. ეს ქვეყნისთვის კარგი იქნება და ძალიან დემოკრატიული. შვიდი პუნქტის თქმა და ერთი მაინც დაგვიკმაყოფილეთ, ცოტა უცნაურად ჟღერს. ჩვენ რა პუნქტებიც გვქონდა, დაგვიკმაყოფილეს. სიტყვა არც ჩვენ გაგვიტეხია და არც „ქართულ ოცნებას”. საჯარო რაღაცები მიყვარს და საჯარო რაღაცების მჯერა. არ ვიცი, დახურულ კარს მიღმა რომ ხვდებოდნენ, არც ერთი არ მალავდა. რაზე ლაპარაკობდნენ, წარმოდგენა არ მაქვს. საჯაროდ ვხედავ იმას, რომ „გირჩს” უნდა პარლამენტში შემოსვლა, მაგრამ წვალობს და რაღაც გზებს ეძებს. უფრო თამამი გადაწყვეტილებები უნდა მიიღოს. ფაქტია, შემოსვლა უნდათ და რაღაც ხელჩასაჭიდი ვერ თქვეს. საარჩევნო ბარიერის საკითხი ინიცირებულია. ანუ, შვიდიდან რაც დააყენეს, ერთია. მოვიდნენ, ხმები გაძლიერდება. უფრო გაბედული ხალხი მიყვარს, გაბედონ“, – განაცხადა ალეკო ელისაშვილმა.

„გირჩმა“ შვიდი საკითხი დაასახელა და განაცხადა, რომ მათგან თუნდაც ერთ-ერთის სრულყოფილად გადაწყვეტის შემთხვევაში, საპარლამენტო ბოიკოტს შეწყვეტს.