ადვოკატმა მიხეილ რამიშვილმა ქვეყანა დატოვა. როგორც რამიშვილი ამბობს, მას ერთ-ერთ საქმეზე ციხით დაემუქრნენ. საუბარია სამოქალაქო დავაზე, რომელიც რამიშვილის მიერ, 2019 წელს შეძენილ ბინას ეხება. სამოქალაქო დავების განმხილველმა სასამართლოს პირველმა ინსტანციამ ადვოკატს ბინა ჩამოართვა და საქმეში დევს დოკუმენტი, სადაც გამოძიება ამტკიცებს, რომ ხელმოწერა გაყალბებულია. რამიშვილის თქმით, სახლის პირველი მეპატრონე გარდაცვლილია და მისი ნათესავები ედავებიან.
“2 მარტს ვტოვებ მე საქართველოს. ვტოვებ იმიტომ, რომ აქ მე არანაირი საშუალება არ მექნება არამარტო ჩემი თავი დავიცვა, არამედ ის ადამიანები დავიცვა, ვის ინტერესებსაც მე დღესაც ვიცავ , სადაც არ უნდა ვიყო იქიდან ჩავერთვები და სასამართლო იქნება თუ ნებისმიერი საგამოძიებო მოქმედება, ყველგან ჩართული ვიქნები. მე ალბათ ძალიან დიდი ხნით წავალ საქართველოდან და მოვითხოვ პოლიტიკურ თავშესაფარს, მე სხვა გამოსავალი ამ ხელისუფლებამ არ დამიტოვა…
ეს [დავის საგანი] არის ერთადერთი ხელწერილი და იურიდიული მომსახურების კონტრაქტი, სადაც თითქოსდა ხელმოწერა ძალდატანებით არის გაკეთებული თუ დაწოლით… ჩატარებულია ექსპერტიზა სამხარაულში, მანამდე იყვნენ ერთ-ერთ კერძო ექსპერტთან მისული. მე იმ ექსპერტისგან ვიცი, რომ მან უარი უთხრა, რაც მათ მოითხოვეს და ცნობილია, რომ მოითხოვეს ის, რა პასუხიც მიიღეს სამხარაულიდან. აქედან გამომდინარე, ზუსტად ეს არის ყველაზე დიდი “კოზირი” გამოძიებისთვის, რომ ამაში მაინც მივიდნენ იმ დასკვნამდე, რომ რაღაცა ნახეს, რომ მიშა რამიშვილმა თითქოს რაღაცა გააყალბა…
მიუხედავად იმისა, რომ წარდგენილი მქონდა არაერთი მტკიცებულება – აუდიო და ვიდეოჩანაწერები როგორ ხდებოდა ამ ბინის გასხვისება და ჩემს მიერ შესყიდვა, ხაზი გადაუსვა აბსოლუტურად და პრეცედენტადაც კი არ დაუშვა და ერთ – ერთი ხელწერილი, გარკვეული დოკუმენტაცია გადააგზავნა საგამოძიებო ორგანოში და აღძრეს საქმე ” უთხრა რამიშვილმა “ფორმულას”, 28 თებერვალს ჩაწერილ ინტერვიუში.
რამიშვილის თქმით, „ქართული ოცნება“ აპირებს ადვოკატთა იმ ჯგუფის განადგურებას, რომელიც აქციებზე დადის და იმ ადამიანების უფლებებს იცავს, რომლებიც თავისუფლებისა და დემოკრატიის დაცვას ითხოვენ.
კომენტარები