ეროვნული ბანკის ყოფილი პრეზიდენტი, რომან გოცირიძე:
კიდევ ერთხელ და მარტივად მოსახლეობის აღწერის საბოლოო შედეგებთან დაკავშირებულ საქსტატის მანიპულაციებზე:
-2014 წლის აღწერით ქვეყნის მთელს მოსახლეობაში საქართველოს მოქალაქეების რაოდენობა იყო 3,685 მილიონი ადამიანი.
2014-2024 წლებში საქართველოს მოქალაქეთა რიცხვი მიგრაციის შედეგად 265 ათასი კაცით შემცირდა. ბუნებრივი მატება ამ წლებში მხოლოდ 5 ათასი ადამიანი იყო. პანდემიის შემდგომ წლებში სიკვდილიანობა მეტია შობადობაზე ანუ არ ხდება ბუნებრივი მატება.
თუ გამოვაკლებთ 2014 წლის საქართველოს მოქალაქეთა რიცხოვნების მონაცემებს 2024 წლამდე ამ კატეგორიის მოქალაქეთა კლების ანუ მიგრაციის მაჩვენებელს, მივიღებთ 3,425 მილიონ ადამიანს 2024 წლისათვის.
ახლა ვნახოთ, რა რიცხვები დაწერა სქსტატმა? თურმე 2024 წლისათვის მთელს მოსახლეობაში საქართველოს მოქალაქეთა რაოდენობა ყოფილა 3,657 მილიონი კაცი. აქედან ვასკვნით, რომ 2024 წელს 2014 წელთან შედარებით საქართველოს მოქალაქეთა რიცხვი შემცირებულა მხოლოდ 28 ათასი კაცით. როგორხ ვხედავთ, აცდენა საზღვრის კვეთის უტყუარ მონაცემებსა (265 ათასი) და არაკვალიფიციური აღწერის შედეგებს შორის 237 ათასი ადამიანია.
ახალი აღწერით გამოდის, რომ ამ ათი წლის განმავლობაში ქვეყანა ფაქტობრივად არავის დაუტოვებია.
სიკვდილი, დაბადება და საზღვრის კვეთა ისეთი სტატისტიკაა, რომელსაც ვერ გააყალბებ.
და ბოლოს, კიდევ ერთი დაშვება: ან 2014 წლის აღწერის მონაცემებია არაზუსტი ან 2024 წლის. ვის როგორ გახსოვთ 2014 წლის აღწერა, ვერაფერს ვიტყვი, მაგრამ შარშან რომ იგი ფაქტობრივად არ ჩატარებულა, ამას ყოველი მეორე საქართველოს მოქალაქე გეტყვით და ათიდან ათივე უცხოეთის მოქალაქე. გაიკითხეთ სანაცნობოში, თუ ვინ მიიღო აღწერაში მონაწილეობა.
საქსტატის არცერთი ინფორმაცია არ არის სანდო. ზოგიერთ შემთხვევაში ეს არაპროფესიონალიზმით და უხარისხო მუშაობითაა განპირობებული, ზოგ შემთხვევაში პოლიტიკური მოტივებით.
კომენტარები