ყოფილი მთავარი პროკურორი ირაკლი შოთაძე, რომელიც კვლავ გენერალური პროკურორობისთვის იბრძვის, ახალი ინიციატივით გამოვიდა, კერძოდ, სამართალწარმოების პროცესში ჩადენილი დანაშაულის გამოძიების დეპარტამენტის შემადგენლობის გაზრდის ინიციატივით:
„ჩემი კონკურენტებისგან გასაუბრებისას მოვისმინე ამ დეპარტამენტის კრიტიკა, რომ ეს დეპარტამენტი არ არის საკმარისად ეფექტიანი. ამ დეპარტამენტის რესურსი იყო თავიდანვე საკმაოდ შეზღუდული. დაკომპლექტებული იყო უფროსის, მოადგილის, 4 პროკურორისა და 10 გამომძიებლის შემადგენლობით და ისინი მაქსიმალურს აკეთებდნენ ყოველთვის.
ზოგადად ეს პროცესი არ არის მარტივი, ამ სირთულეებს განაპირობებს მთელი რიგი გარემოებები, მაგალითად, შესაძლო დანაშაულის ჩადენიდან გასული დიდი დრო და აღნიშნულ საქმეებზე გამოძიებები თავის დროზე განზრახ იყო წაყვანილი არასწორი მიმართულებით, ადგილი ჰქონდა მტკიცებულებების ფალსიფიკაციას, ფაქტების დამახინჯებას. შესაბამისად, სამართლებრივი პროცესი, რასაც ეს დეპარტამენტი უძღვება კიდევ უფრო უნდა გაძლიერდეს და ინტენსიური გახდეს.
სამართლიანობის აღდგენის პროცესი დღესაც ძალზედ აქტუალური საკითხია ჩვენი საზოგადოებისათვის. ამ მიმართულებით საქართველოს მთავარი პროკურატურას დიდი სამუშაო აქვს გაწეული. სისხლის სამართლის დევნა დაწყებულია ბევრი ყოფილი თანამდებობის პირის მიმართ სხვადასხვა კატეგორიის დანაშაულებებზე. ბევრზე დამდგარია გამამტყუნებელი განაჩენი, ბევრზე გრძელდება სასამართლო განხილვები. ასევე მოხდა უკანონოდ ჩამორთმეული ქონებების დაბრუნება და განაჩენების გადასინჯვა ახლად გამოვლენილი გარემოებების გამო, თუმცა ჯერ კიდევ ბევრი ადამიანია, რომელიც ელოდება სამართლიანობის აღდგენას და მაქსიმალური უნდა გავაკეთოთ, რათა ეს პროცესი ბოლომდე მივიყვანოთ. ეს არისს პროკურატურის ერთ-ერთი ძირითადი ვალდებულება. შეიძლება ეს იყოს გრძელი გზა, თუმცა, მე სხვა გზას ვერ ვხედავ.
შესაბამისად, მე ვფიქრობ, ამ დეპარტამენტის საკადრო შემადგენლობა უნდა გაიზარდოს, რათა პროკურატურას მიეცეს შესაძლებლობა კიდევ უფრო აქტიურად გააგრძელოს ეს პროცესი. ასევე გამოსავალი არის საპროცესო კოდექსში გარკვეული ცვლილებების შეტანა, რომელიც დააჩქარებს მსგავსი საქმეების განხილვას.
ვფიქრობ, პროკურატურას უნდა მიეცეს სისხლის სამართლის საქმეების მსგავსად ადმინისტრაციული გადაწყვეტილებების გადასინჯვის შესაძლებლობა ახლად აღმოჩენილი გარემოებების გამო, ვინაიდან მრავლად გვხვდება ძველი საქმეები, სადაც სისხლის სამართლის პროცედურების პარალელურად ადმინისტრაციული წესით ჩამორთმეულია ქონებები, სადაც ასევე ბევრ ადამიანი გამოხატავს უკმაყოფილებას გადაწყვეტილების კანონიერებასთან და დასაბუთებულობასთან დაკავშირებით. ასევე, ვფიქრობ, ამ პროცესს დააჩქარებდა მოსამართლეთა სპეციალიზაცია.
გენერალურ პროკურორად არჩევის შემთხვევაში ასევე ვაპირებ ფართო ჩართულობით ამ საკითხზე დისკუსიის გამართვას სახელმწიფო უწყებების, დარგის სპეციალისტების და აკადემიური, ასევე საერთაშორისო ორგანიზაციების ჩართულობით, რათა ყველამ ვიმსჯელოთ სამართლიანობის აღდგენის პროცესის მაქსიმალურად დაჩქარების გზებზე“
შეგახსენებთ, დღეს საპროკურორო საბჭო გენერალური პროკურორობის კანდიდატს, ყოფილ მთავარ პროკურორს, ირაკლი შოთაძეს უსმენენ. ცნობისთვის, ირაკლი შოთაძის კანდიდატურა საქართველოს ტექნიკურმა უნივერსიტეტმა წარადგინა. შოთაძე საქართველოს მთავარი პროკურორის თანამდებობაზე 2015 წლის 27 ნოემბერს დაინიშნა, ხოლო ხორავას ქუჩის გახმაურებული საქმის გამო, 2018 წლის 31 მაისს თანამდებობა დატოვა.
კომენტარები