„აბა თუ გამოიცნობთ რაზე ილაპარაკა კობახიძემ მთელი ნახევარი საათი იმედზე?” – ნათია მეზვრიშვილი

„ქართული ოცნების“ თავმჯდომარის ინტერვიუს ტელეკომპანია „იმედის“ ეთერში, სოციალური ქსელის საშუალებით გამოეხმაურა პარტია „საქართველოსთვის“ წევრი ნათია მეზვრიშვილი.

„აბა თუ გამოიცნობთ რაზე ილაპარაკა კობახიძემ ინტერვიუს მთელი ნახევარი საათი იმედზე?” – წერს მეზვრიშვილი და იმ თემებზე ამახვილებს ყურადღებას, რომელზე საუბარსაც ქართული საზოგადოება ირაკლი კობახიძისაგან ელოდებოდა.

„საქართველოს მოქალაქე რომ ხარ და ელოდები, რომ ახლა გამოვა ხელისუფლება და ნატოს ლიდერების სამიტზე, ჩამოსვენებულ გმირებზე, ომით გამოწვეულ სოციალურ-ეკონომიკურ პრობლემებზე, უსაფრთხოების მდგომარეობაზე ილაპარაკებს;

მოგაწვდის ინფორმაციას რას აკეთებს უკრაინასთან და მოლდოვასთან, საერთაშორისო პარტნიორებთან თანამშრომლობის მიმართულებით;

როგორია ევროკავშირში გაწევრიანების რეფორმების ამბიციური დღის წესრიგი;

როდის იწყებენ რეფორმებს და ა.შ. და ისევ ისმენ ნაცები და სააკაშვილი.

საფრანგეთის ელჩმა დღეს განცხადება ნაცების მესიჯის გავლენით გააკეთაო; უკრაინას ნაცები მართავენო, არ ვაჭარბებ, უკრაინის ხელისუფლებაში ნაცები (ანუ „ომის პარტია“) არიანო … ომში მყოფ უკრაინაზე თქვა …

აქვე ბატონი პრემიერის ნათქვამი – უკრაინამ ომის თავიდან აცილება ვერ შეძლოც – გავიხსენოთ,“- წერს ნათია მეზვრიშვილი.

ცნობისათვის, „ქართული ოცნების“ თავმჯდომარემ საქართველოსა და მსოფლიოში არსებულ პოლიტიკურ ვითარებაზე ვრცლად ტელეკომპანია „იმედის“ ეთერში, გადაცემაში „იმედი LIVE“ ისაუბრა.