2008 წლის ომის შემდეგ, რუსეთის ფედერაცია ოკუპირებული ცხინვალის რეგიონში არაოფიციალური ანექსიის პოლიტიკას აქტიურად ახორციელებს. მოსკოვი რეგიონში პოლიტიკურ, ეკონომიკურ და სოციალურ სფეროებს სრულად დაეპატრონა. პუტინის უკანასკნელ მცდელობას, ცხინვალის ე.წ. გენერალურ პროკურორად რუსეთიდან ჩაყვანილი ვიტალი სავჩენკო დაენიშნათ, ოკუპირებული რეგიონის დე ფაქტო პარლამენტმა მხარი არ დაუჭირა. ცხინვალელი სოციალური ქსელის მომხმარებლები მიიჩნევენ, რომ ეს შესაძლოა წინასწარ დადგმული სცენარიც ყოფილიყო, მოჩვენებითი წინააღდმეგობის დემონსტრირებისთვის.
ოკუპირებული ცხინვალის ყოფილ ე.წ. გენერალურ პროკურორს, ურუზმაგ ჯაგაევს უფლებამოსილების ვადა 6 აპრილს ამოეწურა. რუსეთის მოქალაქე სავჩენკო, რომელიც კრასნოდარში პროკურორად მუშაობდა, „გენერალური პროკურორობის“ კანდიდატად ე.წ. პრეზიდენტმა, ანატოლი ბიბილოვმა წარადგინა.
13 აპრილის „კენჭისყრაზე“ მას მხარი 30-იდან მხოლოდ 9 ე.წ. დეპუტატმა დაუჭირა. ცხინვალის ადგილობრივ პრესაში გამოქვეყნებული ინფორმაციის მიხედვით, ვიტალი სავჩენკო 35 წლისაა. ის კრასნოდარის მხარეში დაიბადა და გაიზარდა. ჯერ ყუბანის სახელმწიფო უნივერსიტეტში, შემდეგ კი, მოსკოვის სახელმწიფო სამართლის აკადემიაში სწავლობდა. ჯაგაევი, 2016 წელს, ქალაქ სოჭის შინაგან საქმეთა დეპარტამენტის საგამოძიებო სამსახურის უფროსი იყო, სადაც სავარაუდოდ სავჩენკო გაიცნო.
საქმე იმაშია, რომ დე ფაქტო პარლამენტის ოპოზიციონერი დეპუტატები ჯაგაევის ვადამდე გათავისუფლებას მოითხოვდნენ. 2020 წლის აგვისტოში, ცხინვალში, ახალგაზრდა მამაკაცი, ინალ ჯაბიევი მოკლეს. 30 წლის ჯაბიევი დე ფაქტო შს მინისტრ იგორ ნანიევის ავტომანქანაზე 17 აგვისტოს განხორციელებულ შეიარაღებულ თავდასხმაში იყო ეჭვმიტანილი. გავრცელებული ინფორმაციით, მამაკაცი ცხინვალის იზოლატორში სასტიკად აწამეს და საავადმყოფოში მიყვანამდე გარდაიცვალა. ამ ფაქტს ადგილობრივების მხრიდან მწვავე პროტესტი მოჰყვა, რაც „პოლიტიკურ კრიზისში“ გადაიზარდა. მითუმეტეს, რომ მკვლელობაში „მილიციის“ ბრალეულობა იკვეთებოდა.
გასული წლის 4 დეკემბერს, ინალ ჯაბიევის ოჯახის ორგანიზებით ცხინვალის ცენტრში სამართლიანი გამოძიებისა და მკვლელობის თანამონაწილეთა დასჯის მოთხოვნით საპროტესტო აქცია დაიწყო, რომელიც უწყვეტ რეჟიმში 26 თებერვლამდე გაგრძელდა. მასობრივი გამოსვლების გამო, დე ფაქტო მთავრობაც კი გადადგა. ე.წ. პარლამენტარებს მიაჩნდათ, რომ ოკუპირებული რეგიონის „გენერალური პროკურორი“ ჯაგაევი ჯაბიევის მკვლელებს ხელს აფარებდა. ჯაგაევს კი, დე ფაქტო პრეზიდენტი, ანატოლი ბიბილოვი მფარველობდა.
ოკუპირებულ ცხინვალში განვითარებული მოვლენებიდან რამდენიმე დასკვნის გამოტანა შეიძლება. კრემლი, რომელიც ადგილზე ეფექტურ კონტროლს ახორციელებს, ადამიანის ფუნდამენტური უფლებების, მათ შორის სიცოცხლის უფლების დაცვას ვერ უზრუნველყოფს. მოსკოვი საერთაშორისო უფლებადამცველ ორგანიზაციებს ოკუპირებულ ტერიტორიებზე არ უშვებს, რადგან საქართველოს ორივე მიტაცებულ რეგიონში კატასტროფული ჰუმანიტარული მდგომარეობაა და კრიმინალი მძვინვარებს. ადამიანების სიცოცხლე საფრთხეშია და მეტიც, რუსეთის მხარდაჭერით დე ფაქტო პრეზიდენტი მკვლელებს მფარველობს.
ასევე, პუტინი დე ფაქტო ცხინვალში ყველა სფეროს გაკონტროლებას ცდილობს, უკვე რუსეთის მოქალაქეებს ნიშნავს „თანამედობებზე“. რუსეთი აღარც კი მალავს, რომ საქართველოს რეგიონების კოლონიზაციას ეწევა. მართლაც საინტერესოა, დე ფაქტო დეპუტატების წინააღმდეგობა დადგმული სცენარია თუ გულწრფელი ნაბიჯი. თუმცა, გადამწყვეტი მნიშვნელობა მაინც არ აქვს რა სურს ოკუპირებულ ცხინვალს. საბოლოოდ, ყველაფერი ისე დასრულდება, როგორც რუსეთის „ხელმწიფე“ ინებებს და ასე გაგრძელდება მანამ, სანამ ცხინვალში არ მიხვდებიან, რომ მათთვის იდენტობის შენარჩუნების ერთადერთი გზა თბილისთან რეინტეგრაციაა.
ქეთევან ინწკირველი
კომენტარები