„ქართული ოცნება“ პარლამენტის თავმჯდომარის პოსტზე კახა კუჭავას წარადგენს. ამის შესახებ პარტიის ოფისში გამართულ ბრიფინგზე პარტიის თავმჯდომარემ, ირაკლი კობახიძემ განაცხადა.
„მადლობას ვუხდი არჩილ თალაკვაძეს ორი წლის განმავლობაში სპიკერის თანამდებობაზე გაწეული საქმიანობისთვის. მან ურთულეს პერიოდში ჩაიბარა ეს თანამდებობა. 2019 წლის ივნისი იყო ძალიან რთული პერიოდი, როგორც პარლამენტში, ასევე მის გარეთ. ამ 2 წლის განმავლობაში არჩილ თალაკვაძე დიდი წარმატებით უძღვებოდა პოლიტიკურ მუშაობას და სერიოზული წარმატება მოუტანა ჩვენს პარტიას და ჩვენს ქვეყანას. როდესაც მან საკუთარი გადაწყვეტილება გაგვიზიარა, ჩვენ გვქონდა მცირე დისკუსია. მისი პოზიცია ეფუძნებოდა კონკრეტულ მოსაზრებებს. გასული თვეების განმავლობაში ის აქტიურად იყო ჩართული მოლაპარაკების პროცესში და წარმოდგენილი იყო ამ პროცესში როგორც მხარე, ხოლო რაც შეეხება სპიკერის პოზიციას, ის უნდა იყოს არსებითად ნეიტრალური. ჩვენ პატივს ვცემთ მის გადაწყვეტილებას. არჩილ თალაკვაძე ვიცე-სპიკერის პოზიციაზე გააგრძელებს აქტიურ პოლიტიკურ საქმიანობას. მინდა გაცნობოთ, რომ „ქართული ოცნების“ სახელით პარლამენტის თავმჯდომარეობის კანდიდატად წარედგინება კახა კუჭავას კანდიდატურა. კახას აქვს საპარლამენტო მუშაობის გამორჩეული გამოცდილება, საერთაშორისო პარტნიორებთან მუშაობის გამოცდილება, რაც ძალიან მნიშვნელოვანია სპიკერის ფუნქციების წარმატებით შესრულებისთვის. წარმატებებს ვუსურვებ მას ამ პოზიციაზე“, – განაცხადა კობახიძემ.
მანამდე პარლამენტის თავმჯდომარის თანამდებობა არჩილ თალაკვაძემ დატოვა.
კომენტარები