რა მოხდა ცნობილ პიცერიაში – „ყველა გადაგვრია ამ პანდემიამ, რა ვქნათ“

პიცერია Five Sisters Pizza სოციალურ ქსელში სახალისო ისტორიაზე წერს:

„ორი წუთის წინ შემოდის ზარი:

– გამარჯობა, ფასები რომ მითხრათ, თუ შეიძლება…

– 35 ლარიდან იწყება. რომელი პიცა გნებავთ ?

– რა პიცა, თარგმნა მინდა მე. ქართულიდან ინგლისურად.

– სხვაგან მოხვდით, ქალბატონო. პიცერიაში რეკავთ.

– რა პიცერიაში, სათარჯიმნო ბიუროო, აგერ წერია.

– სად წერია ?

– ინტერნეტში.

– არა, ქალბატონო, შეიძლება შეცდომით წერია. – ვპასუხობ. ქალი მითიშავს.

გადის 5 წუთი და კიდევ შემოდის ზარი იგივე ნომრიდან:

– გამარჯობა, სათარჯიმნო ბიუროში სწორად ვრეკავ ?

– პიცერიაში რეკავთ, ქალბატონო.

– რა პიცერია, ნუ გამაგიჟეთ… დამცინით ამხელა ქალს ?

– არ დაგცინით, ქალბატონო, მართლა პიცერიაში რეკავთ. როგორც ჩანს, სადღაც არასწორად არის მითითებული ჩვენი ნომერი. – ქალი თიშავს ტელეფონს.

გადის დაახლოებით ოცი წუთი და ისევ იმავე ნომრიდან შემოდის ზარი:

– გამარჯობა, ქართულიდან მინდა ინგლისურად რაღაცის თარგმნა. სულ პატარაა.

– ისევ ჩვენთან მოხვდით, ქალბატონო, პიცერიაში…

– გავგიჟდე შეიძლება, რა. მეგობარმა ჩამაწერინა ეს ნომერი, მანდ თარგმნიან ყველაზე კარგადო…

– დიდი ტექსტია ?

– ნახევარი გვერდიც არაა. ჩემს ამერიკელ სიძეს მინდა დაბადების დღე მივულოცო – მპასუხობს.

– ჩვენ კი მართლა პიცერია ვართ, მაგრამ გამომიგზავნეთ და დაგეხმარებით.

გამომიგზავნა პატარა და მარტივი ტექსტი. დავიწყე თარგმნა, თან საკუთარ თავზე მეცინება. გადის 10 წუთი და მირეკავს ეს ქალი:

– ისა… შვილო, რა პიცები გაქვთ თქვენ ? მომაშია ამასობაში

ყველა გადაგვრია ამ პანდემიამ, რა ვქნათ“