ქუთაისის მერიაში დღეს დაკავებული ჟურნალისტი პოლიციას არაადამიანურ მოპყრობაში ადანაშაულებს.
ბუბა ჩივაძე ამბობს, რომ მერის ნათესავებისა და მეგობრების ბიზნესინტერესების თემაზე მუშაობდა და სწორედ ეს გახდა მისი დაკავების წინაპირობა.
ჟურნალისტს კლინიკაში პირველადი დახმარება აღმოუჩინეს.
„მოგესალმებით, მეგობრებო. დავტოვე სამედიცინო დაწესებულება, ჩემი დაჟინებული მოთხოვნით, რადგან ჯანმრთელობის მდგომარეობა კიდევ უფრო გამიუარესდა.
ის, რაც ქუთაისის მერმა განახორციელა, პირდაპირ ურტყამს სახელმწიფო სამსახურებს. მან კიდევ ერთხელ უკანონო ბრძანება გასცა, რომ აეკრძალოთ ჟურნალისტებს სახელმწიფო დაწესებულებაში გადაადგილება და მათზე განხორციელდეს უკანონო თვალთვალი “,- წერს ბუბა ჩივაძე სოციალურ ქსელში.
ინფორმაციისთვის, დღეს ქუთაისის მერიის შენობაში „ქუთაისი თუდეის“ რედაქტორმა მერის კაბინეტთან შიმშილობა გამოაცხადა.
ის საპატრულო პოლიციის წარმომადგენლებმა დააკავეს.
ჟურნალისტს ბრალი ადმინისტრაციული სამართალდარღვევათა კოდექსის 173-ე მუხლით წარუდგინეს, რაც პოლიციელის კანონიერი ბრძანებისადმი დაუმორჩილებლობას გულისხმობს და ითვალისწინებს ჯარიმას ან 15 დღემდე პატიმრობას.
კომენტარები