“ივანიშვილმა მითხრა, რომ ეს ნაციონალურმა მოძრაობამ გააკეთა…” – რას ჰყვება ეკა ბესელია

ეკა ბესელია, პირადი, უკანონო კადრების გავრცელებაზე “ტვ პირველთან” საუბრობს:

“უმწვავესი კონფლიქტის პერიოდი იყო ჩემსა და მმართველ გუნდს შორის და მაშინ ხდება ეს.

ივანიშვილმა მითხრა, რომ ეს ნაციონალურმა მოძრაობამ გააკეთა. მე მაშინ გამეცინა და ვთქვი, რომ ეს მათ დროს მოპოვებული უკანონო ჩანაწერია, 2010-2011 წლის, მაგრამ ეს მათ ინტერესებში ახლა რატომ უნდა ყოფილიყო? მე ვიცოდი რომ ეს მათ ხელში იყო და უბრალოდ, მაშინ ამის გავრცელებას ვერ ბედავდნენ. აი, ამ პერიოდში რატომ უნდა დაჭირვებოდა მათ, ლოგიკა არ იყო ამაში. თან მეთოდოლოგია ისეთი იყო გამოყენებული, ასეთი რამ ძალოვანი უწყებების გვერდის ავლით თუ ხდება, მაშინ პირველწყაროს უნდა მიაგნო.

არ დავიღლები მოთხოვნით, რომ პირველწყარო დადგინდეს, ვინც დაგეგმა, ვინც იყო ორგანიზატორი, ის უნდა დაისაჯოს. არ ვახალისებ იმ ქმედებას, რომ უკანონო ჩანაწერი ერთმანეთს გაუზიარონ დაკავებულებმა, მაგრამ არ მინდა ამ სიმძიმის აღება და არ მინდა მათი საპატიმროში გაგზავნა. ჩემთვის პასუხისმგებლობის ვექტორი მიემართება გამოძიებისა და ხელისუფლებისკენ, რომელსაც ვთხოვ ამ უკანონობის განმახორციელებელს. არ იძიებენ, თუ ვერ იძიებენ, ორივე შემთხვევაში პასუხისმგებლობის ტვირთი მათზე გადადის. ფაქტია, ეს იმ პერიოდში მოხდა, როდესაც ჩემი გაჩერება უნდოდათ და როდესაც ივანიშვილი მთხოვდა, გავჩერებულიყავი და ამ ფონს უკავშირდება ეს მორალური ტერორი, სად უნდა ვეძებო დამნაშავე? პირდაპირ უკავშირდებოდა ჩემ მიერ ჩაგდებულ, მოსამართლეთა ათკაციან სიას. მართლა არ დავიღლები, ვიდრე ის პირველწყარო და დამგეგმავი არ დაისჯება. ხელისფლების შეცვლამდე ეს ვერ მოხდება, ალბათ, მაგრამ ოდესმე ეს მოხდება.”