„მოქალაქეების“ ლიდერმა, ალეკო ელისაშვილმა საქართველოში აშშ-ის ელჩის, კელის დეგნანის განცხადების კომენტირებისას აღნიშნა:
„ასეთ რაღაცას მეგობრები და კეთილის მაურველები რომ გვეუბნებიან, წესით, ძალიან უნდა გვრცხვენოდეს ქართველ პოლიტიკოსებს. იმას რომ გეტყვიან, კომპრიმისი არ არის სისუსტე, პარტიულ ინტერესებზე მაღლა ქვეყანა დააყენეთ, ქვეყნის მომავალს უფრო მეტი პასუხისნგებლობით შეხედეთ და თქვენი გაჯიუტებით, ერთადერთი, ვინც ხელებს იფშვნეტს და იცინის, არის რუსეთიო. ამის მეტი რაღა უნდა გვითხრან? წესით უნდა გვრცხვენოდეს და უფრო მეტი მზაობა უნდა გვქონდეს შეთანხმებისთვის. ამ ფონზე გაჯიუტებული ვართ. შეუთანხმებლობა და პოლიტიკური კრიზისი რომ არის, ყველას ბრალია, ვინც იქ ვსხედვართ. მეც დავიბრალებ, მეც ვარ ამაში დამნაშავე. ყველამ თავის თავში უნდა ჩაიხედოს და თავის თავს უნდა დაუსვას კითხვა. როდემდე შეიძლება გაგრძელდეს კრიზისი კი არა, გაჯიუტება. ზოგი თავისი სიტყვის მძევალია, ზოგს სხვა იდეები აქვს თავში, ზოგი თავისი ამბიციების მძევალია. ყველამ უნდა გავიაზროთ, თუ ვინმე ზარალდება ქვეყანა და ხალხია, მათ რეალურ პრობლემებზე არ ვსაუბრობთ. ვსაუბრობთ ხუთი თვეა იმაზე, ვინ შევა პარლამენტში და ვინ – არა“, – განაცხადა ელისაშვილმა.
დეპუტატის თქმით, კრისტიან დანიელსონის ჩამოსვლა, დამაიმედებელია.
„პატარა ბავშვები არ არიან, დაინახეს ჩვენი რეალობა და გაჯიუტება, ასევე კომპრომისების გაკეთება გვიჭირს და ქართველ პოლიტიკოსებს მოლაპარაკებები მკლავჭიდის დაფა გვგონია, სადაც აუცილებლად მოწინააღმდეგეს ხელი უნდა გადაუგრიხო. კარგად იციან ჩვენი რეალობა და კარგია, რომ კრისტიან დანიელსონი ამ რეალობის აღქმით ჩამოვა საქართველოში. რომელი მხარე რა კომპრომისზე წავა არ ვიცი, მაგრამ ვიცი, რა უნდა იყოს. ხუთი თვის თავზე ამ ქვეყნის წვალება უნდა დავასრულოთ და შეთანხმება უნდა მოხდეს“, – განაცხადა ელისაშვილმა.
კომენტარები