მას შემდეგ, რაც აშშ-ს პრეზიდენტმა, ჯო ბაიდენმა, abc NEWS-ისთვის მიცემულ ინტერვიუში თქვა, რომ პუტინი მკვლელია, რუსეთის ფედერაციამ ამერიკიდან საკუთარი ელჩი, ანატოლი ანტონოვი გამოიძახა.
რუსეთის ფედერაციის საგარეო საქმეთა სამინისტროს ოფიციალურ განცხადებაში წერია:
“ამერიკული ახალი მთავრობა ხელისუფლებაში უკვე ორი თვეა და შეიძლება ითქვას, რომ ჯო ბაიდენის ადმინისტრაციას საქმიანობა არც ისე კარგად გამოსდის. ჩვენთვის მთავარია განვსაზღვროთ, თუ როგორ განვითარდება მძიმე მდგომარეობაში მყოფი რუსულ-ამერიკული კავშირები, რომელიც ბოლო წლებში ვაშინგტონს ჩიხში შეჰყავს. დაინტერესებულები ვართ, რომ მისი გარდაუვალი დეგრადაცია არ დავუშვათ. რუსეთის ელჩს აშშ-ში სწორედ ამაზე ექნება კონსულტაცია რუსეთის საგარეო საქმეთა სამინისტროსა და სხვა მაპროფილებელ უწყებებთან “.
კრემლი ამერიკულ სოციალურ ქსელსაც ემუქრება და ულტიმატუმს უყენებს. რუსეთში ამბობენ, რომ თუ “ტვიტერი” მათ მითითებებს არ შეასრულებს და “აკრძალულ” კონტენტს სოციალური ქსელიდან არ აიღებს, ერთ თვეში სოციალურ ქსელს დაბლოკავენ. მანამდე კი რუსეთში ბოლო დღეების განმავლობაში სოციალური ქსელი შეზღუდვებით მუშაობს. კრემლმა მიიღო გადაწყვეტილება შეენელებინა აპლიკაციის გამოყენება.
“როსკომნადზორში” ამბობენ, რომ სოციალურ ქსელ ტვიტერში აკრძალული შინაარსის კონტენტი ვრცელდება. კრემლის მტკიცებით, “ტვიტერში” ვრცელდება ინფორმაცია არასანქცირებული აქციების, ბავშვთა პორნოგრაფიისა და ნარკოტიკების შესახებ. შესაბამისად, მოითხოვენ, რომ კონტენტი, რომელიც მათთვის მიუღებელია, სოციალურმა ქსელმა პლატფორმიდან აიღოს.
“ტვიტერი არ რეაგირებს ჩვენს მოთხოვნაზე, რაზეც მათ წესით რეაგირება უნდა ჰქონდეთ. თუ ასე გაგრძელდა პროცესები “ტვიტერი” ერთ თვეში დაიბლოკება სასამართლოს ნებართვის გარეშე,” – ამბობს “როსკომნადზორის” ხელმძღვანელის მოადგილე ვადიმ სუბოტინი.
კომენტარები