ევროპული საბჭოს პრეზიდენტის წარმომადგენელმა, კრისტიან დანიელსონმა ევროკავშირის წარმომადგენლობაში გამართულ პრესკონფერენციაზე განაცხადა:
„ეს არ არის ჩემი პირველი ვიზიტი საქართველოში, მე ვიყავი როგორც ევროკომისიის წარმომადგენელი და ახლა აქ ვარ, როგორც შარლ მიშელის წარმომადგენელი, მისი ნაყოფიერი ვიზიტის შემდეგ. ჩემი როლია, დავეხმარო ქვეყანაში მიმდინარე ძალიან მნიშვნელოვან პროცესს. ეს ეხება პოლიტიკურ დიალოგს და იმას, რომ ყველა მხარემ მიაღწიოს პროგრესს ამ ძალიან მნიშვნელოვან საქმეში. როგორც აქამდე ფასილიტაციას უწევდნენ ამ პროცესს ელჩი ჰარცელი და ელჩი დეგნანი.
ევროკავშირისთვის ძალიან მნიშვნელოვანია ის, რაც საქართველოში ხდება და არის ჩვენი მხრიდან შეშფოთება იმასთან დაკავშირებით, რომ ქვეყანა პოლიტიკური ჩიხშია შესული და ძალიან ბევრი გამოწვევაა, რომელიც ეხება პანდემიას და ეკონომიკას. ამიტომ, გვჯერა, რომ ახლა დროა, ყველა მხარემ გააკეთოს ყველაფერი, რათა კომპრომისის სახით იპოვოს გამოსავალი.
ჩემი როლი, ისევე როგორც ელჩი დეგნანის როლია, დავეხმაროთ ამ პროცესს. ეს არის პარტიების და მათი წარმომადგენლების საქმე, რომ ნახონ გამოსავალი და გამოვიდნენ ამ მდგომარეობიდან. ეს არის ხედვა ერთიანობისკენ“
კრისტიან დანიელსონი დედაქალქს გამთენიისას ეწვია. დანიელსონი საქართველოში 14 მარტამდე დარჩება. როგორც ცნობილია, მისი ვიზიტის მიზანია, ჩართვა პრეზიდენტ მიშელის ინიციატივით პირველ მარტს განახლებულ პოლიტიკურ დიალოგში, მასში მონაწილე ყველა პარტიის ლიდერთან ერთად.
კომენტარები