სპეცოპერაცია რესტორანში – დაკავებული “კანონიერი ქურდები” და ჩამორთმეული ავტომობილები – სომხეთი

წუხელ სომხეთის პოლიციამ ქალაქ ეჩმიაძინში მასშტაბური სპეცოპერაცია ჩაატარა. ამის შესახებ ახალი ამბების სააგენტო shamshyan.com იუწყება.

სპეცოპერაცია ერთ-ერთ ცნობილ რესტორანში ჩატარდა, რომელიც კრიმინალური „ავტორიტეტების“ ხშირი თავშეყრის ადგილი გახლდათ.

აღნიშნული ობიექტიდან პოლიციის განყოფილებაში სულ 15 ადამიანი გადაიყვანეს, მათ შორის ორი „კანონიერი ქურდი“ – ანდრანიკ საგოიანი, იგივე „ზაპ ლენინაკანსკი“ და ჟირო ბურუტიანი (შაუმიანსკი).

ამოღებულია კრიმინალური „ავტორიტეტების“ ძვირადღირებული ავტომობილებიც: Lexus, Toyota Land Cruiser, Porsche Panamera, BMW.

ცნობისთვის: გასული წლის იანვარში სომხეთის პარლამენტმა მეორე და საბოლოო მოსმენით დაამტკიცა ცვლილებები სისხლის სამართლის კოდექსში, რომლის თანახმად „კანონიერი ქურდობა“ კრიმინალიზებული გახდა, ქურდული სამყაროს წევრობაზე კი სასჯელი გამკაცრდა.