“გარეჯი ჩვენი მემკვიდრეობაა, მაგრამ მოცემულობა რაც გვაქვს არის ის და ვერაფერი შეიცვლება… ეს მოხდება რაღაცის ფასად – და არა, ეს ჩემია და მომეცით…” – მეუფე ვახტანგი

ცურტაველი მიტროპოლიტი, მეუფე ვახტანგი, ტვ პირველის ეთერში იმ თემებზე საუბრობს, რა თემებიც სინოდის სხდომამ განიხილა. ინგა გრიგოლია მას ეკითხება, დავით გარეჯისა და ვაქცინაციის თემებს შორის, რომელი საკითხი უფრო პრიორიტეტული იყო სინოდისთვის?

მეუფე ვახტანგი:

-ორივე პრიორიტეტულია და ყველა ის საკითხი პრიორიტეტულია, რომელიც ქვეყნისთვის აქტუალურია. გარეჯი მტკივნეული თემაა. ეს არის ჩვენი ისტორიული მემკვიდრეობა, მაგრამ მოცემულობა რაც გვაქვს არის ის და ვერაფერი შეიცვლება… ბრალდება წაუყენეს კარტოგრაფებს, მაგრამ ბრალდების წაყენება არ ნიშნავს ბრალის დამტკიცებას… არავის აქვს ამის უფლება, რომ სამშობლოს მოღალატე დაუძახო, მეტი ცუდი რა უნდა უთხრა ადამიანს? რაც შეეხება ივერი მელაშვილზე თავდასხმას, ეს შეურაცხმყოფელია, ამის უფლება არავის არ უნდა ჰქონდეს. ამაზე უნდა იფიქროს სამართალდამცველებმა. ამით ჩვენ უფრო ცუდ საქმეს გავუკეთებთ ქვეყანას. მეც ვნახე ეს კადრი, ძალიან არ მომეწონა, არავის აქვს უფლება ასეთი შეურაცხყოფა მიაყენოს ხანდაზმულ მეცნიერს.

სინოდზე იყო საუბარი იმ ისტორიულ წარსულზე, რომელიც 36 წელს, 38 წელს, რაც დავუშვათ, იმ დროინდელმა კარტოგრაფებმა და იმდროინდელმა კომისიებმა შექმნეს ეს რუკები, მაგრამ ეს საკითხი რჩება დღესაც გადაუჭრელ საკითხად. მოცემულობა არის, რაც არის ის, მაგრამ ჩემი აზრით, მომავალში, ბოლოს და ბოლოს უნდა გადაიჭრას, ეს მოხდება რაღაცის ფასად – და არა, ეს ჩემია და მომეცით… ისტორიულად რომ ჩვენია, ეს ფაქტია და ამას ვერავინ წაშლის, მაგრამ იმ ავბედობის ჟამს, საბჭოთა კავშირის დროს, მაშინ, თქვენ იცით, სერჯო ორჯონიკიძემ და სხვებმა თავისი მამის მამულებივით გააჩუქეს და დაასაჩუქრეს ჩვენი მეზობელი ქვეყნები, რუსეთი, აზერბაიჯანი, სასომხეთი.

სიმართლე გითხრათ, კონტრადზვერვის მონაცემი არა მაქვს, ვისგან მოდიოდა ეს ყველაფერი, მაგრამ ამის დადგენა შეიძლება. მეორე – როცა აწარმოებს ჩვენი მეზობელი და მეგობარი სახელმწფო ომს, ამ დროს ამ განცხადების გაკეთება, ტერიტორია, სადაც გადის საზღვარი ორ მეზობელს შორის, ამის მოთხოვნის დრო და ჟამი არ იყო. ყველა ნათელი გონების ადამიანი იტყვის, რომ რა დროს ამის მოთხოვნაა. გამოიწვევდა ჩვენ დაპირისპირებას და ჩვენ დავზარალდებოდით, ამით საქმე არ გაკეთდებოდა.

მისი უწმინდესობა უღრმავდება საკითხებს და აჩქარებულად არ მიიღებს გადაწყვეტყილებს. მტკივნეულია მისთვის ეს თემა და ცდილობს და ამ აზრისაა, რომ მოლაპარაკება შედგეს ჩვენ მეგობარს ქვეყანასთან, აზერბაიჯანთან. შეიძლება დრო არ არის, მაგრამ რადგანაც წამოიწია, ვიღაცეებს, ეტყობა, აწუხებს ეგ საკითხი და არც უნდა დავაგვიანოთ. თუ ჩვენ ჩავერთვებოდით, გაუგებრობა მოხდებოდა და მართლა სამუდამოდ დავკარგავდით. ჩვენ გადავრჩით, კიდევ კარგი, მაგრამ პროვოცირება საიდან მოდიოდა, შეიძლება ეჭი გქონდეს.

-თქვენც გაქვთ ეჭვი, რომ შეიძლება ეს იყო რუსული სცენარი? – ეკითხება ინგა გრიგოლია.

-შეიძლება, პასუხობს მეუფე ვახტანგი.