ახალციხის რაიონულ სასამართლოში ბორჯომში, შვილის მკვლელობაში ბრალდებული დედის სასამართლო გაიმართა, სადაც მოსამართლემ დაკავებული პატიმრობაში დატოვა. მოსამართლე, მარიკა ჩიტაშვილმა 62 წლის ბრალდებულს, აღკვეთის ღონისძიება – პატიმრობა შეუფარდა, – ინფორმაციას პირველი არხი ავრცელებს.
„შემთხვევის ადგილის დათვალიერების შედეგად ამოღებულ იქნა დანა, ასევე აღმოჩენილია სისხლის ლაქები, მოკლულის ტანისამოსი, რომელზეც ასევე სისხლის ლაქებია და დაზიანებულია,“-აღნიშნა ბრალდების მხარემ.
მათივე განმარტებით, არსებობს, მოწმეთა ჩვენებები, ასევე დაჭერის და ჩხრეკის ოქმები. გარდა ამისა, ჩასატარებელია მთელი რიგი საგამოძიებო პროცედურები. ბრალდების მხარის თქმით, დაკავებული აუცილებლად პატიმრობაში უნდა დარჩეს, რადგან არსებობს მიმალვისა და მოწმეებზე ზეგავლენის საშიშროება, მით უმეტეს, რომ ბრალდებულს საზღვრის კვეთები უფიქსირდება და ასევე საზღვარგარეთ ბინადრობის უფლებაც აქვს.
პროკურატურის მიერ წარმოდგენილ რიგ ბრალდებებს არ ეთანხმება დაკავებულის ადვოკატი, ეკა აბაშიძე. მან საუბრის დასაწყისშივე აღნიშნა, რომ მისი დაცვის ქვეშ მყოფი იყო დაზარალებული და ამას მოწმობს, გასულ წელს მომხდარი ფაქტი, რომელშიც გარდაცვლილს აღკვეთის ღონისძიება შეეფარდა და სადაც დაზარალებული მისივე დედა იყო, მიუხედავად ამისა დედამ შვილს 5000 ლარი გირაო გადაუხადა. მანვე სასამართლოს სამედიცინო დოკუმენტები გადასცა, რომელითაც ირკვევა, რომ მოკლულს რიგი დაავადებები ჰქონდა, ასევე იყო ფსიქო-ემოციურად გაუწონასწორებელი. საზღვარგარეთიდან კი დედა სწორედ, შვილის მისახედად და სამკურნალოდ ჩამოვიდა. ადვოკატი არ ეთანხმება პროკურატურის მიერ წარმოთქმულ აზრს, რომ არსებობს მოწმეთა ჩვენები, რადგან აბაშიძის განმარტებით, დანაშაულის ჩადენის დროს სახლში, იმ კონკრეტულ ოთახში მხოლოდ დედა და შვილი იმყოფებოდნენ. იგი აღკვეთის ღონისძიებად გირაოს, 10 000 ლარის ოდენობით ითხოვდა.
პროცესზე რამდენი სიტყვა წარმოთქვა დაკავებულმა. მისი თქმით ეს არ იყო განზრახ მკვლელობა.
„არ მჯერა, რომ ეს ყველაფერი მოხდა, თითქოს სიზმარში ვარ და ველი რომ ამ სიზმრიდან გამოვალ. ციხეში თუ არ ვიქნები და გამათავისუფლებენ, მე მონასტერში წავალ და აღკვეთილი ვიქნები“-თქვა ბრალდებულმა.
აბაშიძემ თქვა, რომ არ არსებობს მისი დაცვის ქვეშ მყოფის მხრიდან მიმალვის საშიშროება. მან შესთავაზა სასამართლოს რომ ამ საქმის მიმდინარეობის პერიოდში ბრალდებულს ჩამოერთვას საერთაშორისო პასპორტი და ბინადრობის უფლებაც. მიუხედავად ამისა, მოსამართლე, მარიკა ჩიტაშვილმა ბრალდებული პატიმრობაში დატოვა.
„დაკმაყოფილდეს პროკურატურის შუამდგომლობა პატიმრობასთან დაკავშირებით, რადგან სასამართლო თვლის რომ არსებობს მიმალვისა და მტკიცებულებების განადგურების საშიშროება,“-განმარტა მოსამართლემ.
კომენტარები