აშშ-ში კორონავირუსის ახალი შტამით ინფიცირების შემთხვევა გამოვლინდა. ინფორმაციას ამის შესახებ კოლორადოს შტატის ჯანდაცვის ორგანოები ავრცელებენ.
ახალი შტამით ინფიცირება 20 წლის მამაკაცს დაუდასტურდა, რომელიც ამჟამად კარანტინშია გადაყვანილი.
„ბევრი რამ არ ვიცით Covid-19-ის ახალი ვარიანტის შესახებ, მაგრამ გაერთიანებული სამეფოს მეცნიერები მსოფლიოს აფრთხილებენ, რომ ის უფრო გადამდებია. კოლორადელების ჯანმრთელობა და უსაფრთხოება ჩვენი მთავარი პრიორიტეტია და ჩვენ ყურადღებით დავაკვირდებით ამ შემთხვევას“, – განაცხადა კოლორადოს შტატის გუბერნატორმა, ჯარედ პოლისმა.
14 დეკემბერს მეცნიერებმა კორონავირუსის ახალი სახეობა აღმოაჩინეს. ჯანდაცვის მსოფლიო ორგანიზაციაში განაცხადეს, რომ ჯერ არ არსებობს იმის მტკიცებულება, რომ დიდ ბრიტანეთში აღმოჩენილი კორონავირუსის ახალი სახეობა სერიოზულ გავლენას ახდენს ვირუსის სტრუქტურაზე. დიდი ბრიტანეთის ჯანდაცვის მდივანმა, მეთ ჰენკოკმა განაცხადა, რომ ვირუსის ახალი სახეობა შედარებით სწრაფად ვრცელდება, თუმცა უფრო საშიში არ არის.
19 დეკემბერს სამხრეთ აფრიკის რესპუბლიკაში კორონავირუსის კიდევ ერთი ახალი სახეობა გამოავლინეს.
კომენტარები