ქრისტიანული სამყაროს ნაწილი დღეს შობის დღესასწაულს აღნიშნავს. პანდემიის გამო ქვეყნების უმრავლესობაში საშობაო ღონისძიებები განსხვავებულად ტარდება. ვატიკანში, წმინდა პეტრეს ბაზილიკაში რომის პაპმა ფრანცისკემ საშობაო მესა ჩაატარა, რომელსაც წელს, კორონავირუსის პანდემიის გამო, მხოლოდ 100-მდე ადამიანი დაესწრო.
როგორც „როიტერი“ წერს, ღვთისმსახურება ჩვეულებრივზე ორი საათით ადრე დაიწყო, რათა ტაძარში მყოფ პირებს სახლებში დაბრუნება კომენდანტის საათის დაწყებამდე მოესწროთ. ტაძარში მყოფ ყველა პირს, თავად პონტიფიკოსისა და მგალობელთა გუნდის წევრების გარდა, პირბადე ეკეთა.
საშობაო მიმართვისას რომის პაპმა მორწმუნეებს მოუწოდა, ყურადღება გაამახვილონ მათ უსამართლო დამოკიდებულებაზე მათივე ძმებისა და დების მიმართ. გზავნილში პაპმა ფრანცისკემ, ტრადიციულად, მოიხსენია სხვადასხვა ქვეყანა. მათ შორის, აღნიშნა, რომ უახლოეს მომავალში აპირებს, ლიბანსა და სამხრეთ სუდანს ეწვიოს.
რაც შეეხება რომის პაპის ტრადიციულ მიმართვას „ქალაქისა და მსოფლიოსადმი“ (Urbi et Orbi), პონტიფიკოსი მას, წმინდა პეტრეს მოედანზე გამავალი აივნის ნაცვლად, ვატიკანის შიდა დარბაზიდან პარასკევს წაიკითხავს.
შობის დადგომა რამდენიმე საათით ადრე იზეიმეს ბეთლემში, სადაც კოვიდპანდემიის გამო საზეიმო ლიტურგია მცირერიცხოვანი მრევლის თანდასწრებით ჩატარდა.
კომენტარები