ლაგოდეხში, სოფელ თელაში ერთი მრავალშვილიანი ოჯახი ცხოვრობს. ერთი შეხედვით, მათი გასაჭირიც ბევრი სოციალურად დაუცველი ოჯახის მსგავსია, მაგრამ ყველა გასაჭირს რეალური გმირები ჰყავს, ეს გმირები კი მცირეწლოვანი ბავშვები არიან, რომლებსაც ახალი წლის დღეებში ტკბილეული კი არა, შეიძლება პური არ ჰქონდეთ…
აღარაფერს ვამბობთ, მათ საცხოვრებელ პირობებზე. ინგა და თეიმურაზ ტაბატაძეებს ხუთი არასრულწლოვანი შვილი ჰყავთ. უფროსი ბავშვი 9 წლის ასაკშია, ხოლო ყველაზე პატარები, ტყუპები 2 წლისანი არიან. უკიდურეს გაჭირვებაში მყოფი, მრავალშვილიანი ოჯახის უფროსი, თეიმურაზ ტაბატაძე „პრაიმტაიმს” უყვება, რომ უფროსს ჯანმრთელობის მძიმე პრობლემები აქვს და განსაკუთრებული მოვლა სჭირდება, ის შშმ ბავშვია.
„ძალიან მძიმე პირობებში ვცხოვრობთ. მე ინსულტი გადავიტანე და ერთი თვეა, ძლივს წამოვდექი ფეხზე. ბავშვს ურთულესი პრობლემები აქვს. ახლა პენსიაც შეწყვეტილი აქვს, არადა, ერთი თვის განმავლობაში, ჩემი და მისი წამლებისთვის, თითქმის 800 ლარი გვჭირდება. მე ვერ ვმუშაობ, სოციალური დახმარების იმედზე ვართ, ისიც საკვებად ძლივს გვყოფნის. ხშირად, ბავშვები მშივრები არიან” – ამბობს ტაბატაძე.
მრავალშვილიანი ოჯახი, 60 წლის წინ, აშენებულ სახლში ცხოვრობს. ოჯახს არ აქვს მინიმალური საცხოვრებელი პირობები, საყოფაცხოვრებო ტექნიკა და ავეჯი. ტანსაცმელსა და სათამაშოებს, არასრულწლოვან ბავშვებს, მეზობლები და ახლობლები აძლევენ.
„ძირითადად, მეზობლები გვეხმარებიან. სასკოლო ასაკისებსაც მეზობლები ამეცადინებენ, რადგან სახლში არც კომპიუტერი გვაქვს და არც ტელეფონი. ტანსაცმელსაც სხვები ჩუქნიან. ჩვენ არაფრის შეძენა არ შეგვიძლია, წესიერი საწოლი და სკამიც კი არ გვაქვს. გაზიც გადაჭრილი გვაქვს გადაუხდელობის გამო” – ამბობს მრავალშვილიანი მამა.
თეიმურაზ ტაბატაძე ჰყვება, რომ რამდენიმე თვის წინ, სოციალურმა სამსახურმა, მშობლებს, უკიდურეს გაჭირვებაში მცხოვრები ბავშვების ოჯახიდან გაყვანის წინადადებით მიმართა.
„სოციალურ სამსახურში თანამშრომელი გვეუბნებოდა, ბავშვებს გავიყვანთო, მაგრამ ჩვენ გვინდა შვილები სახლში გვყავდეს. ახლა არასამთავრობო ორგანიზაციები გვეხმარებიან, რომ ეს ასე არ მოხდეს. ჩვენი ამბავი რომ გაიგეს, მერიაც ჩაერთო”- თქვა მამამ.
ლაგოდეხის მუნიციპალიტეტის მერიაში განმარტეს, რომ ოჯახის მძიმე ყოფის შესახებ, ინფორმაცია აქვთ და კონკრეტული დახმარების გაწევასაც გეგმავენ.
„საყოფაცხოვრებო პირობების გაუმჯობესებას ბიუჯეტი არ ითვალისწინებს. ამიტომ, გადაწყვეტილება მივიღე, ჩემი საკუთარი ძალებით, სახლის ორი ოთახი და სამზარეულო მოვუწესრიგო. ასევე, აუცილებელ გამოკვლევაზე გავაგზავნეთ, ოჯახის დიასახლისი და ბავშვი, იმისათვის, რომ მისთვის პენსიის აღდგენა მოხდეს“ – განაცხადა ლაგოდეხის მუნიციპალიტეტის მერმა, ჯონდო მდივნიშვილმა.
უკიდურესად გაჭირვებული ოჯახის დასახმარებლად, საზოგადოებას გაერთიანებისაკენ მოუწოდა, თელავში მცხოვრებმა მარტოხელა მამამ, დავით მოსიაშვილმა. ჩვენ ვაგროვებთ მათთვის გარკვეული თანხას, საკვებს, ავეჯს, ტანსაცმელს და ყველაფერს გავაკეთებთ იმისათვის, რომ ბავშვები მშივრები აღარ იყვნენ.”- განაცხადა მოსიაშვილმა.
ტაბატაძეების ხუთი მცირეწლოვანი შვილი ახლა, საზოგადოების მხარდაჭერის მოლოდინშია.
პრაიმტაიმი
კომენტარები