მიუყვანს თუ არა ანიმატორებს “ოცნება” ოპოზიციას? – კობახიძის განმარტება

“ახალი კანონპროექტი, რომელიც სახელმწიფო დაფინანსებისა და უფასო საეთერო დროის ერთი წლით შეწყვეტას გულისხმობს, იმ შემთხვევაში, თუ პოლიტიკური პარტია საპარლამენტო ცხოვრებაში არ ჩაერთვება, არის გამიზნული მისთვის, რომ პოლიტიკური პარტიები უფრო მეტად დაფიქრდნენ ბოიკოტის გადაწყვეტილების მიღებამდე, ეს წამახალისებელი მექანიზმია” , – ასე აფასებს “ქართული ოცნების” აღმასრულებელი მდივანმა, ირაკლი კობახიძე , ახალ კანონპროექტს.

კითხვაზე: პარლამენტში ოპოზიციის შესასვლელად რატომ ვერ მოიძებნა წახალისების სხვა მეთოდი, – კობახიძემ განაცხადა, რომ მმართველმა პარტიამ საკმარისი წამახალისებელი ნაბიჯი გადადგა:

“მეტი რა წავახალისოთ, ვეუბნებით რომ გადავთვლით ყველაფერს და 1% ცდომილება იქნება რიგგარეშე არჩევნებს ვნიშნავთ, ვეუბნებით რომ საარჩევნო რეფორმა განხორციელდება სისტემის კუთხით და საარჩევნო ადმინისტრირების კუთხით. იმდენი რამე დავდეთ ჩვენ მაგიდასთან, რომ მეტი რა წავახალისოთ, ანიმატორებს ვერ მოვუყვანთ მოლაპარაკების მაგიდასთან”