“ქართული ოცნების” ერთ-ერთმა ლიდერმა არჩილ თალაკვაძემ “ღამის კურიერის” ეთერში განაცხადა, რომ ოპოზიციამ და მეოთხე პრეზიდენტმა ბოდიში უნდა მოიხადონ, რადგან არჩევნები არ გაყალბებულა.
ამის დასტურად მან მოიყვანა არასამთავრობო ორგანიზაცია “სამართლიანი არჩევნების” მიერ გამოქვეყნებული ინფორმაცია ხმების პარალელური დათვლის შედეგებთან დაკავშირებით, რომლის მიხედვითაც ცდომილება ცესკოს მონაცემებთან შედარებით უმნიშვნელოა და საპარლამენტო მანდატების რაოდენობაზე გავლენას ვერ ახდენს.
“ვფიქრობ, ორგანიზაცია “სამართლიანი არჩევნების” ამ განცხადების შემდეგ მეოთხე პრეზიდენტმა და მთელმა ოპოზიციამაც უნდა მოიხადოს ბოდიში, ვინაიდან ოპოზიციის მთავარი ბრალდება, რომ თითქოს არჩევნები გაყალბდა, უსაფუძვლოა. ეს დასტურდება ამ განცხადებით, რომ არჩევნების არანაირი გაყალბება არ ყოფილა და მანდატების რაოდენობა არის ზუსტად ისე გადანაწილებული, როგორც ეს ცესკომ თავის შედეგებში აჩვენა.
დღეს სამართლიანობა მოითხოვს ოპოზიციამ მოიხადოს ბოდიში, მათი მთავარი ტყუილის გამო, რომ თითქოს არჩევნები გაყალბდა. ამის შემდეგ, ჩვენ მზად ვართ ნებისმიერ ჯანსაღ ოპოზიციასთან ვისაუბროთ და განვაგრძოთ დისკუსია პარლამენტში.
ჩვენ ვიყავით მოლაპარაკების ოთხ რაუნდზე, შესაბამისად, არსად მისვლის პრობლემა ჩვენ არ გვაქვს.
მინდა ყველა მოქალაქემ იცოდეს, რომ სიების ჩახსნა, არ ნიშნავს იმ დეპუტატების მანდატების გაუქმებას ვინც ზღვარი გადალახა, შესაბამისად, თუ მათ სურთ უნდა მოგვმართონ ანულირებასთან დაკავშირებით. ეს არის მათი სახე, როგორ ატყუებენ ყოველ ნაბიჯზე მოქალაქეებს და მანიპულირებენ.
“ქართული ოცნება” რიგგარეშე არჩევნებს არ განიხილავს და არც განიხილავდა. ჩვენ არ ვაპირებთ ამ შანტაჟს დავექვემდებაროთ, რომელიც “ნაციონალური მოძრაობის” და უმანდატო, არჩევნებში წაგებული პოლიტიკოსების მიერ არის ნაკარნახევი”
კომენტარები