ვინ არიან მიწვეულნი ახალარჩეული პარლამენტის პირველ სხდომაზე და რა წესების დაცვა მოუწევთ მათ

დღეს, 11 დეკემბერს, პარლამენტის შენობაში ახალარჩეული პარლამენტის პირველი სხდომა 12:00 საათზე გაიხსნება.

მე-10 მოწვევის პარლამენტის პირველ სხდომაზე, რეგლამენტის შესაბამისად, მოწვეული არიან: საქართველოს პრეზიდენტი, ქვეყნის პრემიერ-მინისტრი, მთავრობის წევრები, აჭარისა და აფხაზეთის ავტონომიური რესპუბლიკების უმაღლესი საბჭოს თავმჯდომარეები, აჭარისა და აფხაზეთის ავტონომიური რესპუბლიკების მთავრობის თავმჯდომარეები.

ასევე, საქართველოს საკონსტიტუციო და უზენაესი სასამართლოების თავმჯდომარეები, გენერალური პროკურორი, ეროვნული ბანკის პრეზიდენტი, გენერალური აუდიტორი, იუსტიციის უმაღლესი საბჭოს მდივანი, ქალაქ თბილისის მერი და საკრებულოს თავმჯდომარე

სახალხო დამცველი, ცენტრალური საარჩევნო კომისიის თავმჯდომარე, სრულიად საქართველოს კათოლიკოს-პატრიარქი, სხვა რელიგიური კონფესიების უმაღლესი სასულიერო პირები, საქართველოში აკრედიტებული დიპლომატიური მისიებისა და მედიის წარმომადგენლები.

პანდემიასთან დაკავშირებული რეგულაციების გათვალისწინებით, პარლამენტის შენობაში მყოფი პირებისთვის სავალდებულოა პირბადის ტარება.

ცნობილია, რომ საქართველოს პატრიარქი ილია მეორე მეათე მოწვევის პარლამენტის პირველ სხდომას არ დაესწრება.