“სააკაშვილის მხარდაჭერა, ჩემთვის, ძალიან მნიშვნელოვანია”

ერთიანი ნაციონალური მოძრაობის” პარტიის თავმჯდომარე გრიგოლ ვაშაძე აცხადებს, რომ იგი დიდი ალბათობით პარლამენტში არ შევა.

მისი თქმით, ის ქუთაისის მოსახლეობას დაპირდა, რომ თუ მაჟორიტარულ ნაწილში ვერ გაიმარჯვებდა, პარლამენტში სიით არ შევიდოდა.

„მე ისედაც და ასედაც დიდი ალბათობით პარლამენტში აღარ შევდივარ. იმიტომ, რომ ჩემს ქუთაისელებს, ჩემს ბიჭებს და გოგონებს პირობა მივეცი, რომ თუ ვერ ვიგებთ მაჟორიტარულ არჩევნებს, მე სიით პარლამენტში არ შევდივარ. პირობა მივეცი“, – განაცხადა ვაშაძემ გადაცემაში „ღამის კურიერი“.

მისივე თქმით, დღეის მდგომარეობით, ოპოზიციამ მეორე ტურში მონაწილეობა არ უნდა მიიღოს.

„დღეის მონაცემებით, ოპოზიციამ მეორე ტურში მონაწილეობა არავითარ შემთხვევაში არ უნდა მიიღოს. ჩვენ რომ ეს პროცესი დაგვეწყო, რომელზეც ამდენი ხანია მიგვითითებდნენ არასამთავრობო ორგანიზაციები და ჩვენი სტრატეგიული მოკავშირეების წარმომადგენლები, ეს შესაძლებელი გახდებოდა“, – განაცხადა ვაშაძემ.

კითხვაზე, 21 ნოემბრამდე შეიძლება თუ არა რამე გაკეთდეს, ვაშაძემ უპასუხა: „ჩემი სასოწარკვეთაც ამ განცხადებაში გამოიხატა“.

„რაღაცა უნდა გაკეთდეს იმიტომ, რომ ჩვენ 2021 წელს თუ შევედით ერთპარტიული, ჩრდილოეთ კორეული პარლამენტით და მარგინალიზებული ოპოზიციით, რომელსაც მოქალაქის დაცვის არავითარი სამართლებრივი ბერკეტი აღარ დარჩება და ყველა ჩვენი დემოკრატიული თანამეგობრობის წინაშე გამოვჩნდებით როგორც ადამიანები, რომლებსაც თვითმმართველობა არ შეუძლია, ეს იქნება სრული კატასტროფა“, – განაცხადა გრიგოლ ვაშაძემ გადაცემაში „ღამის კურიერი“.

ვაშაძე ასევე აცხადებს, რომ მოვლენების განვითარება მალე აჩვენებს, რომ იგი მართალია. 

„თვლა არ დამიწყია, ვიცი, რომ აბსოლუტურად სწორად მოვიქეცი. არავისთან არაფერი არ შემითანხმებია, მაგრამ იმ ადამიანების, მათ შორის მესამე პრეზიდენტის, აზრი და მხარდაჭერა, ღია ან პირადული, ჩემთვის ძალიან მნიშვნელოვანია”, – განაცხადა ვაშაძემ გადაცემაში „ღამის კურიერი“.

კითხვაზე, როგორია გაერთიანება „ძალა ერთობაშიას“ პოზიცია, ვაშაძემ უპასუხა: „ზოგმა მოვლენების განვითარების დალოდება ამჯობინა, ზოგმა მხარდაჭერა ღიად გამოხატა, ზოგმა სრულიად სწორად, კონსტიტუციური უფლება გამოიყენა და თავისი აზრი გამოთქვა. თვლას ნუ დავიწყებთ. ღმერთმა დაგვიფაროს, რომ ეს ყველაფერი ისე არ დამთავრდეს, როგორც საქართველოს მოქალაქეს უნდა, მაგრამ მოვლენების ლოგიკა გვაჩვენებს, რომ აბსოლუტურად სწორი ვიყავი”, – განაცხადა ვაშაძემ.