სომხეთის პატრიარქი მოსახლეობას სიმშვიდისკენ მოუწოდებს

სომხეთის პატრიარქი გარეგინ მეორე სომხეთის მოსახლეობას მიმართავს და სიმშვიდისკენ მოუწოდებს.

„ჩვენ ვლოცულობთ ყველა იმ ადამიანისთვის, ვინც არცახში იბრძოდა, ვინც იქ დაიღუპა. ვინც არცახის დამოუკიდებლობისთვის 30 წლის განმავლობაში იბრძოდა და ვინც ბრძოლის ველზე ბოლო, 44-დღიანი ომის დროს დაეცა. ჩვენი მრავალსაუკუნოვანი ისტორიის გათვალისწინებით, მოგიწოდებთ ეროვნული ერთიანობისკენ, არ ავყვეთ ემოციებს და ძალადობისგან და არეულობისგან თავი შევიკავოთ” – განაცხადა გარეგინ მეორემ. ამის შესახებ Armenpress იუწყება.

ამასთანავე, გარეგინ მეორემ მოუწოდა სომხეთის ხელისუფლებას და არაღიარებული მთიანი ყარაბაღის დე ფაქტო მთავრობას, რომ სომხეთის მოსახლეობას განუმარტონ მიღებული გადაწყვეტილებების არსი და ამ გადაწყვეტილებების ზეგავლენა სომხეთის მომავალზე.

ცნობისთვის, მთიან ყარაბაღში ცეცხლის შეწყვეტის შესახებ შეთანხმების 9-პუნქტიანი გეგმა გამოქვეყნდა, რომელსაც რუსეთის პრეზიდენტმა ვლადიმერ პუტინმა, აზერბაიჯანის პრეზიდენტმა ილჰამ ალიევმა და სომხეთის პრემიერ-მინისტრმა ნიკოლ ფაშინიანმა მოაწერეს ხელი. ილჰამ ალიევმა აზერბაიჯანის მოსახლეობას დიდი გამარჯვება მიულოცა.