სომხეთის ოპოზიცია აპირებს, რომ პარლამენტის რიგგარეშე სესია დანიშნოს, სადაც პრემიერ-მინისტრის, ნიკოლ ფაშინიანის გადადგომას მოითხოვს. ადგილობრივი მედიის ცნობით, შესაბამისი განცხადება პარტია „აყვავებული სომხეთის“ დეპუტატმა, გევორგ პეტროსიანმა გააკეთა.
„რიგგარეშე სესიაზე ჩვენ პირველ რიგში დავაყენებთ საომარი მდგომარეობის გაუქმებისა და პრემიერ-მინისტრის გადადგომის საკითხებს“, – აცხადებს პეტროსიანი.
ოპოზიცია პრემიერის გადადგომას მთიანი ყარაბაღის შესახებ გაფორმებული შეთანხმების გამო ითხოვს.
სომხეთის პრემიერ-მინისტრმა, ნიკოლ ფაშინიანმა გვიან ღამით განაცხადა, რომ რუსეთისა და აზერბაიჯანის პრეზიდენტებთან ხელი მოაწერა შეთანხმებას, რომელიც მთიან ყარაბაღში საომარი მოქმედებების შეწყვეტას ითვალისწინებს. სომხეთის პრემიერის განცხადებას ერევანში პროტესტი მოჰყვა. ასობით ადამიანი ერევანში, რესპუბლიკის მოედანზე შეიკრიბა. დემონსტრანტების ნაწილი მთავრობის სახლში შეიჭრა. აქციის მონაწილეები ფიზიკურად გაუსწორდნენ სომხეთის პარლამენტის თავმჯდომარეს. სომხეთის პრემიერმა მოგვიანებით გავრცელებულ მიმართვაში აღნიშნა, რომ სხვა გამოსავალი არ ჰქონდა.
შეთანხმებას ზეიმი მოჰყვა ბაქოს ქუჩებში. განცხადება გააკეთა აზერბაიჯანის პრეზიდენტმა, ილჰამ ალიევმაც, რომლის თქმით, „ყარაბაღის კონფლიქტის დარეგულირების საქმეში წერტილი დასმულია“. ალიევის განმარტებით, შეთანხმების ერთ-ერთ პუნქტს მთიან ყარაბაღში რუსეთისა და თურქეთის ერთობლივი სამშვიდობო მისია წარმოადგენს.
უკვე გამოქვეყნდა გაფორმებული შეთანხმების ტექსტიც. ცხრაპუნქტიანი შეთანხმების ერთ-ერთი პუნქტი მთიან ყარაბაღში 2 000-მდე რუსი მშვიდობისმყოფელის განლაგებას ითვალისწინებს.
კომენტარები