მამუკა ხაზარაძე – საქართველოში დღეს 77 000 მოშიმშილე ბავშვია

პარტია „ლელო საქართველოსთვის“ ლიდერის მამუკა ხაზარაძის განცხადებით, დღეის მდგომარეობით საქართველოში 77 000 ბავშვი შიმშილობს.

როგორც ხაზარაძემ თბილისის საქალაქო სასამართლოში პროცესის დაწყებამდე ჟურნალისტებს განუცხადა, ეს არის პრობლემა, რომელიც მმართველმა პარტიამ ვერ მოაგვარა.

„ჩვენი ღია ოფისიდან ბრიფინგებს ვაგრძელებთ იმ ინტენსიური სასამართლოს პროცესების ფონზე, რომელიც მუშაობის დროს არ გვიტოვებს. ჩვენი ბრიფინგის თემა ეძღვნება საქართველოში ბავშვთა შიმშილიანობას და იმ გაუსაძლის მდგომარეობას, რომელიც უკვე შექმნილია წლების განმავლობაში და რა პრობლემაც ვერანაირად ვერ გადაწყვიტა „ქართული ოცნების“ ხელისუფლებამ. საქართველოში დღეს არის 77 000 მოშიმშილე ბავშვი“, – განაცხადა ხაზარაძემ.

ამასთან, პარტიის წარმომადგენლის გრიგოლ გეგელიას განცხადებით, „ლელო საქართველოსთვის“ ხელისუფლებაში მოსვლისთანავე სრულად აღმოფხვრის ამ პრობლემას. მისი თქმით, პრობლემის მოგვარების გზას მეტი სამუშაო ადგილების შექმნაში, მცირე და საშუალო ბიზნესის ხელშეწყობაში ხედავენ.