საქართველოს პრემიერ-მინისტრმა გიორგი გახარიამ USAID-ის ადმინისტრატორის მოადგილეს, ბონი გლიკს აშშ-ის მთავრობის უშუალო მხარდაჭერით, საქართველოში ივანკა ტრამპის ეკონომიკური ინიციატივის განხორციელებისთვის მადლობა გადაუხადა.
მთავრობის მეთაურმა და ბონი გლიკმა დღეს, მთავრობის ადმინისტრაციაში გამართული შეხვედრისას ახალი პროგრამის – YES-Georgia-ს მნიშვნელობაზე ისაუბრეს. აღინიშნა, რომ აშშ-ის მთავრობის მსგავსი მხარდაჭერა კიდევ ერთხელ მკაფიოდ ადასტურებს აშშ-საქართველოს შორის არსებულ მჭიდრო, მეგობრულ და სტრატეგიულ პარტნიორობას.
აშშ-ის საერთაშორისო განვითარების სააგენტომ (USAID) საქართველოში საჯაროდ გამოაცხადა YES-Georgia პროგრამის გაფართოების შესახებ, რომელიც ქალი მეწარმეების ხელშეწყობისკენ იქნება მიმართული და 2024 წლის დასაწყისისთვის, ახალი პროგრამა 2500-ზე მეტი ქალისთვის ბიზნესმენეჯმენტის ტრენინგს, იურიდიულ და საბუღალტრო სერვისებს, მენტორობისა და ნეთვორქინგის შესაძლებლობებს უზრუნველყოფს. ინიციატივის ფარგლებში, პროგრამა, USAID-ის მიერ 840,000 აშშ დოლარით დაფინანსდება.
კომენტარები