აშშ-ის პრეზიდენტ დონალდ ტრამპსა და პირველ ლედის, მელანია ტრამპს კორონავირუსი დაუდასტურდათ, – ამის შესახებ აშშ-ის პრეზიდენტი სოციალურ ქსელ “ტვიტერში“ წერს.
“ვიწყებთ კარანტინსა და გამოჯანმრთელების პროცესს,“- წერს ტრამპი.
მანამდე კორონავირუსი დაუდასტურდა დონალდ ტრამპის მრჩეველს, ჰოუფ ჰიქსს. ჰოუფ ჰიქსი, სხვა უფროს თანაშემწეებთან ერთად, სამშაბათს პრეზიდენტს ოჰაიოში ახლდა, სადაც ტრამპმა ჯო ბაიდენთან დებატები გამართა. ოთხშაბათს კი ჰიქსი პრეზიდენტთან ერთად იმყოფებოდა მინესოტაშიც, სადაც წინასაარჩევნო კამპანიასთან დაკავშირებული ღონისძიება გაიმართა.
ცნობისთვის, თავდაპირველად ტრამპი იმ ადამიანთა რიცხვს მიეკუთვნებოდა, რომლებიც პირბადეს უსარგებლოდ მიიჩნევდნენ და ის ვირუსისგან თავის დაცვის ზოგიერთ რეკომენდაციას უგულებელყოფდა. პრეზიდენტი ხშირად ჩნდებოდა საზოგადოებაში პირბადის გარეშე, რის გამოც ეპიდემიოლოგთა კრიტიკის ობიექტი ხდებოდა.
აღსანიშნავია, რომ ამერიკის შეერთებული შტატები კორონავირუსით ინფიცირებულთა რაოდენობის თვალსაზრისით, მსოფლიოს პირველი ქვეყანაა, სადაც საერთო ჯამში, ვირუსის 7.4 მილიონი შემთხვევაა გამოვლენილი, 212 660 პაციენტი გარდაიცვალა, ხოლო 4.7 მილიონი ადამიანი გამოჯანმრთელდა.
კომენტარები