შურისძიება და ორი გარდაცვლილი – რა მოხდა ყაზბეგში?

შინაგან საქმეთა სამინისტროს ინფორმაციით, ყაზბეგში რუსეთის მოქალაქე განზრახ მკვლელობის ბრალდებით დააკავეს.

უწყების ცნობით, გამოძიებამ დაადგინა, რომ 14 სექტემბერს, სასაზღვრო გამშვებ პუნქტ დარიალის მიმდებარე ტერიტორიაზე, ურთიერთშელაპარაკებისას წარმოშობილი კონფლიქტის დროს, დაკავებულის ვ.გ.-ს მამას, ა.გ.-ს საქართველოსა და რუსეთის ორმაგმა მოქალაქემ, ა.მ.-მ მიაყენა ჯანმრთელობის დაზიანება, რის შედეგადაც ა.გ. გარდაიცვალა.

მათივე ინფორმაციით, ამის შემდეგ, გარდაცვლილის შურისძიების მოტივით, ცივი იარაღისა და ბლაგვი საგნის გამოყენებით მრავლობითი დაზიანება მიაყენა ა.მ.-ს, რის შემდეგაც ის გარდაიცვალა.

პოლიციამ ვ.გ. მომხდარიდან რამდენიმე საათში, ცხელ კვალზე დააკავა. გამოძიება სისხლის სამართლის კოდექსის 108-ე მუხლით მიმდინარეობს, რაც განზრახ მკვლელობას გულისხმობს. დანაშაული 7-დან 15 წლამდე ვადით პატიმრობას ითვალისწინებს.