შაქარაშვილის საქმის ოქროს მოწმის ხმაურიანი ჩვენება – რამდენიმე წუთის წინ გაირკვა, რომ გურამ ამირხანაშვილის მეხუთე ჩვენების გამოქვეყნებაზე საგამოძიებო ორგანო შესაბამის გამოძიებას აწარმოებს.
„გურამ ამირხანაშვილის მიერ ყველა ინფორმაცია მოწოდებულია უშუალოდ ამ პიროვნების მიერ. რაც შეეხება ბოლო ჩვენევის გამოქვეყნებას, ჩვენი მიზანია გამოძიების ეტაპზე მოწმეებმა, რომლებიც დაიკითხებიან, არ იცოდნენ გამოძიების ვერსიები და იმ პირთა ჩვენებები, რომლებიც უკვე გამოიკითხნენ გამოძიების ეტაპზე, რაც ხელს უშლის გამოძიებას. ეს პირები შემდეგ უკვე მოდიან მომზადებული პოზიციებით, ეს ჩვენი ინტერესი იყო და ადვოკატების გაფრთხილებაც სწორედ ამას ემსახურებოდა.
რაც შეეხება უშუალოდ ჩვენების გამოქვეყნებას, ამასთან დაკავშირებით პროკურატურა და საგამოძიებო ორგანო ატარებენ შესაბამის ღონისძიებებს და აღნიშნულ გარემოებას მიეცემა სამართლებრივი შეფასება, ასევე იმ პირების ქმედებებსაც, რომლებიც დგანან აღნიშნულის უკან, შესაბამისი სამართლებრივი შეფასება მიეცემა,” – აღნიშნა დავით ყაზარაშვილმა.
მედიაში გამოქვეყნებული ჩვენების მიხედვით, გურამ ამირხანაშვილი, ახალი გამოკითხვისას, „ტოიოტა კამრიში“ გამართული დიალოგის დეტალებსაც იხსენებს. მისი მტკიცებით, არჩილ გაგნიძემ შემდეგი შეკითხვა დაუსვა: „როგორ მაგრადაც დარბიხართ, ისე მაგრად თუ იცით ცურვა?“
უკვე წლების მანძილზე, მედია აქვეყნებს საიდუმლო დოკუმენტებს, დახურული სასამართლო სხდომის ოქმებს, უკვე წლებია “ალია” ითხოვს, გაირკვეს, ვინ ავრცელებს გრიფით საიდუმლო დოკუმენტაციას, თუმცა, პროკურატურა ამ დრომდე ყურსაც არ იბერტყავდა. მეტიც, გიორგი გაბუნიას საქმეზე, სუსიდან გავიდა ინფორმაცია, თუმცა, არც ამაზე ჰქონია ვინმეს რეაქცია.
რამდენიმე დღეში სასამართლო პროცესი უნდა გაიმართოს – რა წერია ასეთი ამირხანაშვილის ბოლო ჩვენებაში და რატომ აღშფოთდა პროკურატურა? – საქმე იმაშია, რომ ამირხანაშვილის ბოლო ჩვენება, მკვეთრად განსხვავებულია წინა 4 ჩვენებისგან და ამირხანაშვილის ტრაგედიიდან თვენახევრის შემდეგ იხსენებს ფრაზებს, რომლებიც მანქანაში მოისმინა.
პროკურატურა ცდილობს ისე წარმოაჩინოს, რომ ამირხანაშვილის ჩვენება ძალზედ მნიშვნელოვანია, სინამდვილეში ამირხანაშვილი, რომელმაც თვენახევრის შემდეგ გაიხსენა მანქანაში მოსმენილი დიალოგი, ამბობს, რომ “როგორც ახსოვს” დაახლოებით ასეთი საუბარი მოისმინა. “როგორც ახსოვს” – არის თუ არა დაზუსტებული ჩვენება, ამას გამოძიება დაადგენს.
ასევე ამირხანაშვილი იმასაც ამბობს, რომ მას დილამდე გიორგის გამოჩენის იმედი არ დაუკარგავს – რაც იმას ნიშნავს, რომ ადგილზე, მან საფრთხე ან ვერ შეაფასა რეალურად, ან მუქარა არ ჰგავდა რეალურს!
მაშ, რატომ აქვს ამ ჩვენებას პროკურატურისთვის ასეთი მნიშვნელობა და როგორ აპირებს ამ ჩვენების საფუძველზე საქმის გახსნას? სასამართლოში ბრალის დამტკიცებას?
სინამდვილეში, ამირხანაშვილის მეხუთე ჩვენება მხოლოდ იმის დასტურია, რომ იგი ჩვენებებს არსებითად ცვლის და ჩნდება ეჭვი, რომ იმაზე მეტი იცის, რასაც ამბობს!
ამირხანაშვილის მეხუთე ჩვენება იხილეთ აქ.
ალია
კომენტარები