23 წლის პროგრამისტის თამარ ბაჩალიაშვილის გარდაცვალების სავარაუდო მოტივი საიდუმლო ფაილების გახსნაა. კერძოდ, როგორც “ფორმულა” წყაროზე დაყრდნობით იუწყება, ბაჩალიაშვილმა, ერთ-ერთ პროექტზე მუშაობისას გახსნა საიდუმლო ფაილები, ლაპარაკია ქართველი მაღალჩინოსნების, კერძოდ, სამი ადამიანის კომპრომატზე. რა შინაარსის იყო ეს კომპრომატები, უცნობია. ასევე “ფორმულას” ცნობით, გაუჩინარების დღეს, გოგონას “ვოთსაპში” გაუგზავნეს ლოკაცია, სადაც ის უნდა მისულიყო და დაინტერესებული მხარისთვის აღნიშნული საიდუმლო მასალები გადაეცა. ამ ვერსიის ირგვლივ ambebi.ge-ს საკუთარ მოსაზრებას უზიარებს ექსპერტი უსაფრთხოების საკითხებში
დავით კუხალაშვილი:
– ყველა ვერსიას აქვს არსებობის უფლება… რადგან ამაზე ლაპარაკობენ, შესაძლოა რაღაც საფუძველიც ჰქონდეს. შესაძლოა ეს იყოს მაკომპრომეტირებელი მასალები კონკრეტულ პირებზე. არც ის მგონია, გოგონას მარტო სამი ადამიანის საიდუმლო მასალებზე ჰქონოდა წვდომა.
ზოგადად შეგვიძლია ვილაპარაკოთ, რომ მას ჰქონდა წვდომა კონკრეტული პირების მაკომპრომეტირებელ ინფორმაციებზე – ისინი შესაძლოა ყოფილიყვნენ მაღალჩინოსნები, ბიზნესმენები და ა.შ. შესაძლოა აქ ლაპარაკი იყოს ისეთ მასალებზე, რომელთა გამოყენება ყოველთვის შეუძლია უცხო ქვეყნის სადაზვერვო სამსახურებს, ფინანსურ ან კრიმინალურ სამყაროს, რათა გარკვეული ზეგავლენა იქონიონ თავიანთი პოზიციების გასამყარებლად. ყველამ უნდა ვიცოდეთ, რომ ყველა სახის ინფორმაცია, რომელიც ინტერნეტში შეგვაქვს, ან იქედან ვიღებთ, მარტივად კონტროლირებადია იმ სახელმწიფოებისთვის, ვისაც ინტერნეტსივრცესთან წვდომა აქვს. თუ დააკვირდებით, ბოლო დროს საქართველოში გამოძიებას რა ჩანაწერებიც სჭირდება, ყველაფრის მოპოვება უცხო ქვეყნებთან ოფიციალური მიმოწერებით ხდება. ყველამ უნდა ვიცოდეთ, რომ ინტერნეტი ეს არის დაზვერვის ერთ-ერთი უმნიშვნელოვანესი გამოსაყენებელი წყარო. რაც უნდა მყარი სისტემები შევქმნათ, ვერანაირად ვიქნებით დაცული, ამიტომ ინტერნეტის მოხმარებასთან დაკავშირებით ფრთხილად უნდა ვიყოთ.
არსებობენ ადამიანები, რომელთაც აქვთ საშუალება ყოველგვარი ფიქსირების გარეშე შეაღწიონ ინტერნეტში და მიიღონ სასურველი ინფორმაცია. საქართველოშიც არიან მაღალკვალიფიციური სპეციალისტები, რომელთაც შეუძლიათ გააკონტროლონ ჩვენი მიმოწერა, მაგალითად, “ფეისბუქში” და ა.შ. კომპრომენტაციის პროცესში მარტო სპეცსამსახურები კი არ არიან დაინტერესებული, არამედ ფინანსური და კრიმინალური წრეებიც. არ არის გამორიცხული, რომ მათ გამოყენებას უცხოური სპეცსამსახურები ცდილობდნენ. რაიმე ისეთით თუ ვსარგებლობთ, რომელიც ჩვენი ტრადიციისთვის და ურთიერთობებისთვის არის მიუღებელი და ვერიდებით რაღაცეების გამჟღავნებას, უცხო სახელმწიფოები ამ მიმართულებით მუშაობენ. ამიტომ ვამბობ, რომ როდესაც ფსიქოლოგიური პორტრეტი დგება, ერთ მიმართულებად შეიძლება აიღონ ის, რომ რომელიმე ჩვენგანი არის პორნოსაიტების მომხმარებელი და შეიძლება ეს შემდგომ გამოყენებულ იქნას გარკვეული ფსიქოლოგიური ზეგავლენისთვის.ასევე დაგაინტერესებთ
– რაზე მიანიშნებთ?
– 2018 წლის ფორუმზე იძებნება გარკვეული ინფორმაცია, რომელშიც ლაპარაკია კომპანია ZAG-ის მიერ პორნო საიტების დამზადებასა და გარკვეული სტატისტიკის მომზადებაზე. ეს ინფორმაცია თუ რაღაც კავშირშია ამ კომპანიასთან, ვფიქრობ, ეს საინტერესო და მნიშვნელოვანი უნდა იყოს გამოძიებისთვის.
პორნჰაბმა 2018 წელს მსოფლიოს მასშტაბით პორნოგრაფიის მომხმარებელთა კვლევები ჩაატარა და ამ კვლევების მიხედვით, ორი პიროვნება, რომლებიც მაღალი ალბათობით, IT მიმართულების სპეციალისტები არიან, ფორუმზე, სავარაუდოდ, ამ კომპანიაზე საუბრობენ…
ინტერნეტში იძებნება ორი კომპანია ZAG. ერთი 2015 წელსაა დაფუძნებული, რომელშიც ბაჩალიაშვილი მუშაობდა და მეორეა 2019 წელს დარეგისტრირებული, რომელიც ელექტროსკუტერების შემოყვანითაა დაკავებული. ამ ორ პიროვნებას შორის 2018 წელსაა ლაპარაკი (ანუ 2019 წელს დარეგისტრირებულ კომპანიას არ უნდა გულისხმობდნენ) და ისინი წერენ, რომ კომპანია ZAG-ი დაკავებულია პორნოსაიტების კეთებით და საიტზე შესულთა სტატისტიკის კვლევით. დასკვნას ზუსტად ვერ ვაკეთებ, ვინაიდან არ გვაქვს საიდენტიფიკაციო მონაცემები, მაგრამ ვფიქრობ, ეს გამოძიებისთვის საყურადღებო უნდა იყოს.
უნდა დაველოდოთ ექსპერტიზის დასკვნას, სადაც ბევრი რამ გამოიკვეთება და გამჟღავნდება. რასაც ტელევიზიით ვუსმინე, ეს შეიძლება ნაკლებად სარწმუნოდ ჩავთვალოთ და არა სარწმუნოდ. არა მგონია, ამ ინფორმაციას გამოძიებიდან გამოეჟონა. ზოგადად, ის მასალები საჯაროვდება ხოლმე, რაც ადვოკატებს უვარდებათ ხელში. ისინი თავის პიარზე მუშაობენ, რათა ზეგავლენა მოახდინონ როგორც საგამოძიებო პროცესზე, ისე სხვა მიმართულებით.
რამდენადაც ვიცი, ამ საგამოძიებო მასალებში არის პერსონალური მონაცემები და მათზე წვდომა შეზღუდულია. ვინმე ძალიან გიჟი უნდა იყოს, აიღოს მასალა და გარეთ გამოიტანოს, ვინაიდან ყველა წვდომა დაფიქსირებულია. იმასაც არ გამოვრიცხავ, სისტემაშიც იყვნენ უცხო ქვეყნის სადაზვერვო სამსახურის წარმომადგენლები.
– საით იხრება თქვენი, როგორც პროფესიონალის ვერსია?
– ვიზიარებ ვერსიას, რომ ეს ამბავი უკავშირდება სამსახურებრივი მოვალეობის შესრულებას. არ ვამბობ, რომ კონკრეტულად ZAg-ს, მაგრამ გოგონა სხვაგანაც ასრულებდა მოვალეობას და შესაძლებელია ფინანსურ წრეებზე, ან კონკრეტულ პირებზე, ან სულაც კონკრეტული პოლიტიკური პარტიების შეკვეთებზეც მუშაობდა – ამის გამორიცხვაც არ შეიძლება. ყველაფერს სიღრმისეული ექსპერტიზა გვიჩვენებს. რა დონის წაშლაც არ უნდა განხორციელდეს, ყველა არხის აღდგენა შეიძლება. შესაძლოა, გოგონა მართლაც შევიდა, დაფიქსირდა და ხელში ჩაუვარდა თუნდაც ფულის გათეთრების ფაქტები, პირადი ცხოვრების ამსახველი კადრები, ან ისეთი პერსონალური მონაცემები, რომლებიც კონკრეტულ პოლიტიკურ პარტიას, ან თუნდაც კრიმინალურ სამყაროს დასჭირდა და ა.შ. შესაძლოა ეს ყველაფერი კომბინირებულადაც იყოს. ექსპერტიზის დასკვნები ბევრ რამეს მოჰფენს ნათელს.
ambebi.ge კომპანია ZAG-ის ადვოკატს ქეთევან მირიანაშვილს დაუკავშირდა, რომელმაც კომპანიის მიერ პორნოსაიტების დამზადება-კვლევასთან დაკავშირებული ინფორმაცია უარყო:
– ჩემთვის უცნობია და ეს პირველად მესმის. საერთოდაც, ფორუმზე და კომენტარებში ვინც რას დაწერს, ამაზეა აგებული ეს რაღაც გაუგებრობა, კითხვები და საკითხები. ამ კითხვებს რომ პასუხი გაეცეს, უნდა გაიხსნას და გაიშიფროს კომპიუტერი. ამაზე კომენტარსაც ვერ გავაკეთებ. ზოგი რუსულ სპეცსამსახურებზე ლაპარაკობს, ზოგი კიბერდანაშაულზე, ზოგიც – საიდუმლო მასალებზე… დაველოდოთ ექსპერტიზის და გამოძიების შედეგებს და დანარჩენზე მერე ვილაპარაკოთ.
ამბები.ჯი
კომენტარები