,,რაღაც დღეების განმავლობაში კენტები და ლუწი ნომრებით მანქანები იყოს დაშვებული ან კონკრეტულ უბნებში დავაყენოთ კამერები, ფასიანი შესვლა” – კალაძე საცობებზე

თბილისის მერმა კახა კალაძემ ,,იმედი ლაივის” ეთერში განაცხადა:

,,დღეს ქალაქში ყველაზე დიდი პრობლემა არის მანქანაზე დამოკიდებულება და ავტომობილების რაოდენობა და ის, რომ მერია არაფერს არ აკეთებს, რა თქმა უნდა, არის შესაძლებელი კონკრეტული გადაწყვეტილებები, როგორც სხვადასხვა ქვეყნებში ხდება. მაგალითად თუ გვინდა ამ პრობლემის მოგვარება, შეგვიძლია მაგაზეც შევჯერდეთ, რაღაც დღეების განმავლობაში კენტები და ლუწი ნომრებით მანქანები იყოს დაშვებული. ან კონკრეტულ უბნებში დავაყენოთ კამერები, ფასიანი შესვლა, როგორც გაკეთდა ეს ბევრ ევროპულ ქალაქში, მაგრამ  საზოგადოებაც უნდა იყოს მზად ამისთვის, ისე არ გამოვა, რომ მუნიციპალიტეტი არაფერს აკეთებს და პრობლემა არის, უნდა მივიღოთ გადაწყვეტილება და ყველამ გავიჭირვოთ… ამ ყველაფერს დრო სჭირდება…

…ბევრი ამბობს იმას, რომ რატომ არ აკეთებთ, მაგალითად, ისე, როგორც მოსკოვში გააკეთეს წრიულები. ჩვენი ქალაქის რელიეფი არ იძლევა ამის საშუალებას. როდესაც დარგის სპეციალისტებს, უცხოელებს ვთხოვეთ, რომ გაეკეთებინათ პროექტი, თუ რა შეიძლება იყოს გამოსავალი, ძალიან რთულია იმ თვალსაზრისით, რომ თბილისი არის ჩიხივით. რელიეფიდან გამომდინარე, შეუძლებელია წრიულების გაკეთება, რომელიც, რა თქმა უნდა, გარკვეულწილად განტვირთავდა დედაქალაქს. ვნახოთ ის ორი კონკრეტული პროექტი, რომელიც კვლევაზეა გაშვებული, რა შედეგს მოგვცემს და ამის შემდეგ უკვე გვეცოდინება, რა არის გასაკეთებელი…”