როდის და რატომ წაშალა ქვრივიშვილმა ივანიშვილთან გადაღებული ფოტო? – ლაშა ბერულავა

ჟურნალისტი, ლაშა ბერულავა:

ზოგის ასეთი მოქმედება გვახსოვს, ზოგის – უკვე დაგვავიწყდა და ზოგის კი არც ყოფილა ისე გახმაურებული, რომ დაგვმახსოვრებოდა, არადა, ქვემოთმოყვანილ შემთხვევაში საქმე ეხება ოცნების პოლიტსაბჭოს წევრს, ეკონომიკის მინისტრსა და აწ უკვე ვიცე-პრემიერ მარიამ ქვრივიშვილს, რომელზეც კიდევ ერთი ამბის მოყოლას ამ რამდენიმე დღის წინ დაგპირდით.

მალხაზ გულაშვილთან ოქტომბრის დასაწყისში სტუმრად მყოფმა კახი კახიშვილმა რომ ქვრივიშვილი სასტიკად გააკრიტიკა, ამავე დროს მიანიშნა, რომ ზოგიერთები პოლიტსაბჭოდან ხან “ოცნების” კრიტიკოსები არიან, ხანაც აპოლოგეტებიო, ეტყობა ერთ-ერთ ეპიზოდად ის ამბავი იგულისხმა, ახლა რომ გიყვებით:

გავრილოვის ღამის შემდგომ პერიოდში, როცა ქუჩაში გამოსული ახალგაზრდები ქვას ქვაზე არ ტოვებდნენ, თითქმის მთელი თბილისი ბობოქრობდა და “ოცნების” ერთგულნი ირყეოდნენ, ვითარცა ლერწამნი ქართაგან ძლიერთა, მარიამ ქვრივიშვილი და მისი ოჯახობა ერთ-ერთნი ლერწამთაგანნი იყვნენ:

კომპანიამ, სადაც მარიამ ქვრივიშვილის მეუღლე მუშაობდა, მაშინ საქართველოს ევროპული კურსის მხარდამჭერი პოსტი გამოდო, თავად მარიამ ქვრივიშვილმა კი რამდენიმე პოლიტიკური ფოტო და სტატუსი წაშალა, მათ შორის, ის ფოტოებიც კი, სადაც თავად ბიძინა ივანიშვილი ფიგურირებდა.

მაშინ ქ.ნი მარიამი იმენად წონადი ფიგურა არ გახლდათ, როგორც ახლაა, ამიტომ ვიღაცეებმა “ზემოთ” მისი ეს ნაბიჯები ან არ შეიმჩნიეს, ან შეიმჩნიეს და გაატარეს. მაგრამ არ ეძინა ოცნების იდეურ ჯარისკაცს ნინო ჯღარკავას, რომელსაც ასეთ დროს სიფხიზლეს მართლაც ვერ დაუწუნებ და განგაში ატეხა: ისეთი პოსტი დაწერა, მარიამ ქვრივიშვილის საქციელის უყურადრებოდ დატოვება უკვე აღარ გამოდიოდა. შინაარსი დაახლოებით ასეთი ოყო, როგორ თუ პოლიტსაბჭოს წევრი ბედავს და ბიძინასთან გადაღებულ ფოტოებს შლისო.

მაშინ ნინო ჯღარკავას ბევრი და ბევრნაირად შეეხვეწა, წაშალე ეს პოსტიო, მაგრამ მან ხვეწნას ულტიმატუმი დაუპირისპირა: ქვრივიშვილმა დააბრუნოს, რაც წაშალა და მეც წავშლი, რაც დავწერეო.

საბოლოოდ, ქვრივიშვილი დამარცხდა: მან მართლაც დააბრუნა ფბ-სივრცეში წაშლილი შიგთავსი (ტარანი თვლითაა-ს პრინციპით), სამაგიეროდ, მისადმი კრიტიკული სტატუს-კომენტარები ნინო ჯღარკავას ფბ-სივრციდან გაქრა.