კოალიცია “ცვლილებებისთვის” წევრი, საგარეო პოლიტიკის სპეციალისტი, გიორგი ბუტიკაშვილი:
ირაკლი კობახიძემ გიორგი ზურაბაშვილი, საქართველოს საგარეო საქმეთა მინისტრის პირველი მოადგილე, პრემიერ-მინისტრის სპეციალურ წარმომადგენლად დანიშნა რუსეთთან ურთიერთობის საკითხებში. თან ზურაბაშვილი საგარეო საქმეთა სამინისტროში თანამდებობასაც ინარჩუნებს.
ერთი შეხედვით, შეიძლება ითქვას: რა შეიცვალა? აბაშიძეც პრემიერის სპეციალური წარმომადგენელი იყო, ზურაბაშვილიც იგივე სტატუსით იქნება. დიპლომატიური ურთიერთობები რუსეთთან არ აღდგენილა.მაგრამ ზუსტად აქ არის ზებრის თავი დამარხული!აბაშიძე-კარასინის ფორმატი წლების განმავლობაში სპეციალურად იყო გამიჯნული ოფიციალური დიპლომატიისგან. ხელისუფლებას ყოველთვის შეეძლო ეთქვა: ეს არ არის რუსეთთან სახელმწიფოთაშორისი პოლიტიკური დიალოგი; ეს არის სპეციალური, შეზღუდული არხი ვაჭრობის, ეკონომიკის, ტრანსპორტისა და ჰუმანიტარული საკითხებისთვის.ახლა ამ გამიჯვნის შენარჩუნება ბევრად რთულია.რუსეთთან პირდაპირ დიალოგს უკვე ის ადამიანი აწარმოებს, რომელიც პარალელურად საქართველოს საგარეო პოლიტიკის ოფიციალური აპარატის ერთ-ერთი ყველაზე მაღალი თანამდებობის პირია. ფორმალურად ისევ შეიძლება ,,პრემიერის სპეციალური წარმომადგენელი,, ერქვას, მაგრამ საგარეო საქმეთა მინისტრის პირველი მოადგილე სახელმწიფოს საგარეო პოლიტიკისგან ცალკე მდგომი ფიგურა ვერ იქნება. თანამდებობას სწორედ იმიტომ ჰქვია სახელმწიფო თანამდებობა, რომ ადამიანი იქ საკუთარ თავს კი არა, სახელმწიფოს წარმოადგენს.კიდევ უფრო საინტერესოა მანდატი.კობახიძემ ამჯერად მხოლოდ ვაჭრობა, ეკონომიკა და ჰუმანიტარული ურთიერთობები აღარ ახსენა. თქვა, რომ წარმომადგენლის ერთ-ერთი მთავარი ამოცანა იქნება ,,რუსეთის ფედერაციასთან კონფლიქტის მშვიდობიანი მოგვარება,,.
ანუ, ის, რაც ადრე შეგნებულად იყო შეფუთული როგორც ნახევრად არაფორმალური, ტექნიკური და ოფიციალური დიპლომატიისგან გამიჯნული არხი, ახლა საქართველოს საგარეო საქმეთა სამინისტროს ხელმძღვანელობის დონეზე გადავიდა. აბაშიძე-კარასინის ფორმატი შეიძლებოდა ბიძინას „სპეციალურ არხად,, გაესაღებინა. როცა იმავე არხს საგარეო საქმეთა სამინისტროს პირველი მოადგილე ხელმძღვანელობს და მის ამოცანებში უკვე „კონფლიქტის მოგვარებაც,, ჩნდება, სიტყვა „არაფორმალური,, მნიშვნელობის კარგვას იწყებს. კიდევ უფრო კონკრეტულად ,,ქართული ოცნება,, რუსეთთან პირდაპირ დიალოგზე გადადის, თან იმის პარალელურად, როცა პროდასავლურ ოპოზიციურ პარტიებს კრძალავს და პროცესი დაწყებულია.
კომენტარები