„დიდი შვიდეულის“ (G7) ქვეყნები ჩერნობილის ატომური ელექტროსადგურის დაზიანებული დამცავი კონსტრუქციის აღსადგენად 260 მილიონ ევროს გამოყოფენ. გადაწყვეტილება მას შემდეგ მიიღეს, რაც რუსეთის დრონით თავდასხმის შედეგად დაზიანებულმა სარკოფაგმა რადიოაქტიური მასალების შეკავების ძირითადი დამცავი ფუნქციები დაკარგა.
ევროპის რეკონსტრუქციისა და განვითარების ბანკის (EBRD) ინფორმაციით, საუბარია სპეციალურ გუმბათზე, რომელიც 1986 წლის ბირთვული კატასტროფის დროს განადგურებულ მეოთხე რეაქტორს ფარავს.
დამცავი კონსტრუქცია 2025 წლის 14 თებერვალს რუსული დრონის დარტყმის შედეგად დაზიანდა. თავდასხმამ დაარღვია მისი ჰერმეტულობა, დააზიანა გარე და შიდა საფარი, ასევე უსაფრთხო ფუნქციონირებისთვის აუცილებელი სისტემები.
„დიდი შვიდეულის“ ქვეყნები აცხადებენ, რომ ჩერნობილის დამცავი კონსტრუქციის დაზიანება მხოლოდ უკრაინის პრობლემა არ არის და ის საერთაშორისო ბირთვული უსაფრთხოებისთვის სერიოზულ გამოწვევას წარმოადგენს.
წინასწარი შეფასებით, სარკოფაგის სრულფასოვანი აღდგენა სულ მცირე 500 მილიონი ევრო დაჯდება. შესაბამისად, G7-ის მიერ გამოყოფილი 260 მილიონი ევრო საჭირო თანხის მხოლოდ ნაწილია. საერთაშორისო პარტნიორებს დარჩენილი დაფინანსების მობილიზებისკენ მოუწოდებენ.
სპეციალისტების შეფასებით, სამუშაოები 2030 წლამდე უნდა დასრულდეს, რათა თავიდან აიცილონ კონსტრუქციის კოროზია და უსაფრთხოების დამატებითი რისკები.
ამასთან, საერთაშორისო სპეციალისტების ინფორმაციით, მიუხედავად დამცავი კონსტრუქციის დაზიანებისა, ჩერნობილის ტერიტორიაზე რადიაციის დონე დასაშვებ ფარგლებში რჩება.
კომენტარები